完善法例條文　減少無謂爭議　文：瑋公子

政圈成日都有人嘈，話香港好多法例未能夠與時並進，有啲又寫到唔清唔楚，搞到唔少人有機會走法律罅。咁，當局係咪要適時檢視下啲古老條例，提交立法會修訂一下呢？

舉個例，根據現行《公眾潔净及防止妨擾规例》，任何人喺公眾地方「耙撥、揀拾或掘出」廢棄物可能觸犯《规例》。不過，而家唔少公公婆婆經常喺街頭收集廢紙皮，翻垃圾桶收集汽水罐膠樽，有人甚至喺街邊煙灰盅搵煙頭。依啲行為已經構成上述條例罪行，隨時可以拉得罰得。冇錯，瑋公子好理解當局基於體諒和諧嘅考慮，對依種行為當睇唔到，唔執法。但係既然係咁，點解唔根據社會嘅發展修訂一下條例內容，又或者廢左佢呢？

仲有，宏福苑大火之後，先發現雖然未有法例，但原來一直有規定地盤唔准吸煙，只好靠工人自律。之不過，人嘅劣根性往往都會戰勝所謂嘅自律，煙癮起上嚟，話之理啦！好勒，宏福苑搞到咁大劑，當局又煞有介事咁做嘢喎。於是人人又盯實地盤工人吸煙問題，暫時又好似收歛咗好多。其實，政府已經向立法會提交地盤全面禁煙條例，議會已經審議得七七八八，預料7月中暑假前可通過。瑋公子建議立法會真係應該再詳細睇下條法例細節，查找不足，以及對啲灰色地帶講清楚。

最近就有網民問瑋公子，究竟地盤嘅定義係乜？範圍有冇規定呢？而家唔少舊樓要做大廈維修，棚架搭到大廈兩呎範圍之外，有啲仲搭出到行人路，如果有人喺行人路棚架對出吸煙，距離幾遠先至算唔違法呢？準則又係咩呢？仲有，而好多工程都要掘馬路，工人會封咗條馬路用圍板或圍欄封住個維修部分，咁如果有工人又或者路人行過，企喺嗰度旁邊吸煙，咁又有冇違法呢？

老實講，瑋公子識條鐵咩，梗係請教行內大佬啦。A君以前喺超人間公司負責起樓，而家自己開公司做老闆，對相關條例識得比瑋公子多多聲，佢就話，任何一個維修地盤都有一份範圍圖則俾當局批准至可以開工，究竟邊度係地盤範圍跟圖則就最清楚。不過，伸出維修樓宇兩呎以外嘅棚架，通常都無劃在圖則之上，咁如果企喺棚架或者坐咗喺棚架上吸煙，如果立會通過當局提出的修訂法例生效，理論上是會犯法。但目前依然係個灰色地帶。（嗱，依度係話獨楝舊樓維修棚架，如果係起樓地盤，又或者係好似宏福苑咁八幢一齊維修，咁成個範圍都已經係地盤，喺裡面任何一個地方吸煙，都已經違法喇）。同樣道理，棚架搭出行人道係方便作業，好可能冇列入圖則，所以喺依個灰色地帶吸煙，可能會冇事，但亦好大機會中招。

講咁多，瑋公子只不過係苦口婆心請求當局同尊貴嘅立法會議員，除咗上述條例之外，快快脆脆，認認真真檢視一下現行嘅條例，太舊嘅、唔啱用就廢咗佢，唔係就睇吓有乜修訂，堵塞漏洞，避免不必要嘅爭議同誤會。

嗱，咪咁沉重勒，不如同大家推介一個輕鬆節目。內地最近拍左部片，只係用左千五萬制作費，結果上映至今內地票房勁收十五億。全片以佔8成用潮洲話對白，講嘅係工人離鄉別井謀生，對家鄉親人嘅思念，以及家人期盼他們回鄉團圓嘅故事。依部電影今個月18號已經喺香港有得睇喇，部電影名字叫做「給嫲嫲的情書」，劇情好有意思，好感動，更加發人深省，非常值得捧場㗎！快啲去戲院輕鬆下啦。好喇，今日又係咁先，下次見啦！