完善法例条文　减少无谓争议　文：玮公子

政圈成日都有人嘈，话香港好多法例未能够与时并进，有啲又写到唔清唔楚，搞到唔少人有机会走法律罅。咁，当局系咪要适时检视下啲古老条例，提交立法会修订一下呢？

举个例，根据现行《公众洁净及防止妨扰规例》，任何人喺公众地方“耙拨、拣拾或掘出”废弃物可能触犯《规例》。不过，而家唔少公公婆婆经常喺街头收集废纸皮，翻垃圾桶收集汽水罐胶樽，有人甚至喺街边烟灰盅揾烟头。依啲行为已经构成上述条例罪行，随时可以拉得罚得。冇错，玮公子好理解当局基于体谅和谐嘅考虑，对依种行为当睇唔到，唔执法。但系既然系咁，点解唔根据社会嘅发展修订一下条例内容，又或者废左佢呢？

仲有，宏福苑大火之后，先发现虽然未有法例，但原来一直有规定地盘唔准吸烟，只好靠工人自律。之不过，人嘅劣根性往往都会战胜所谓嘅自律，烟瘾起上嚟，话之理啦！好勒，宏福苑搞到咁大剂，当局又煞有介事咁做嘢㖞。于是人人又盯实地盘工人吸烟问题，暂时又好似收歛咗好多。其实，政府已经向立法会提交地盘全面禁烟条例，议会已经审议得七七八八，预料7月中暑假前可通过。玮公子建议立法会真系应该再详细睇下条法例细节，查找不足，以及对啲灰色地带讲清楚。

最近就有网民问玮公子，究竟地盘嘅定义系乜？范围有冇规定呢？而家唔少旧楼要做大厦维修，棚架搭到大厦两呎范围之外，有啲仲搭出到行人路，如果有人喺行人路棚架对出吸烟，距离几远先至算唔违法呢？准则又系咩呢？仲有，而好多工程都要掘马路，工人会封咗条马路用围板或围栏封住个维修部分，咁如果有工人又或者路人行过，企喺𠮶度旁边吸烟，咁又有冇违法呢？

老实讲，玮公子识条铁咩，梗系请教行内大佬啦。A君以前喺超人间公司负责起楼，而家自己开公司做老板，对相关条例识得比玮公子多多声，佢就话，任何一个维修地盘都有一份范围图则俾当局批准至可以开工，究竟边度系地盘范围跟图则就最清楚。不过，伸出维修楼宇两呎以外嘅棚架，通常都无划在图则之上，咁如果企喺棚架或者坐咗喺棚架上吸烟，如果立会通过当局提出的修订法例生效，理论上是会犯法。但目前依然系个灰色地带。（嗱，依度系话独楝旧楼维修棚架，如果系起楼地盘，又或者系好似宏福苑咁八幢一齐维修，咁成个范围都已经系地盘，喺里面任何一个地方吸烟，都已经违法喇）。同样道理，棚架搭出行人道系方便作业，好可能冇列入图则，所以喺依个灰色地带吸烟，可能会冇事，但亦好大机会中招。

讲咁多，玮公子只不过系苦口婆心请求当局同尊贵嘅立法会议员，除咗上述条例之外，快快脆脆，认认真真检视一下现行嘅条例，太旧嘅、唔啱用就废咗佢，唔系就睇吓有乜修订，堵塞漏洞，避免不必要嘅争议同误会。

嗱，咪咁沉重勒，不如同大家推介一个轻松节目。内地最近拍左部片，只系用左千五万制作费，结果上映至今内地票房劲收十五亿。全片以占8成用潮洲话对白，讲嘅系工人离乡别井谋生，对家乡亲人嘅思念，以及家人期盼他们回乡团圆嘅故事。依部电影今个月18号已经喺香港有得睇喇，部电影名字叫做“给嫲嫲的情书”，剧情好有意思，好感动，更加发人深省，非常值得捧场㗎！快啲去戏院轻松下啦。好喇，今日又系咁先，下次见啦！