香港邮政一于私营化啦！　文：玮公子

最近，政圈同坊间都嘈得好交关，就系香港邮政营运基金在2024/25年度录得破纪录的8.21亿元亏损，累计连续8年出现赤字依件事，正因为咁，政府向立法会申请46亿元拨款支持香港邮政运作。近年自从电子通讯以及社交平台普及，人与人之间的邮递书信已经大幅减少，邮政亏损主因系传统信件量结构性减少，加上营运成本有增无减，“生意”难做在所难免。

其实，最致命嘅因素，系香港邮政并唔系独立的私人企业或法定机构，而系一个政府部门。目前佢系以“营运基金”模式运作，财政上要自负盈亏，但喺法定身份、商业扩展及营运决策上，下下就受到政府部门框架的严格限制，咁就认真弊家伙啦！

嗱，先同大家讲下有关香港邮政嘅体制现况。1）佢系属于政府决策局（商务及经济发展局）辖下部门，并唔似其他国家咁“公司化”或者“私有化”。2）佢用营运基金模式运作，自1995年起自负盈亏，透过日常邮递及集邮等业务收入维持运作。不过，大家应该明白，正正因为佢系政府部门，佢哋所有员工都系公务员，薪酬和福利比私营企业高，人力资源调配又缺乏弹性，营运策略又俾公务员体制限制咗市场竞争力，此消彼长之下想要赚钱盈利，谈何容易。咁，咪系蚀足10年囉！

香港邮政连续8年录得亏损，早前向立法会申请拨款46亿元，翻新空邮中心及支持未来三个年度的运作。在议事厅上，不乏听到一啲对香港邮政嘅批评，查实佢哋真系好无辜，用营运基金模式自负盈亏，但营运策略又诸多限制，有好嘅idea都下下申请等批，试问，被人绑手绑脚，就算“宇宙最强”都冇符啦，唯有挨打！

嗱，香港邮政如果唔系用营运基金模式，好似30年前咁是政府部门，好似其他部门咁列入政府经常性预算之内，可能就唔系今日咁嘅结果。当年政府要将依个部门采取咁嘅方式经营，系想为库房减负担，想赋予部门保留收入同埋灵活调配资源嘅权利，方便更迅速咁应对市场转变，提升生产力。不过，过去10年以来，成效好唔理想，依个模式喺实际运作中面临唔少掣肘（例如邮费定价及薪酬机制仍受政府规管），加上近年邮件量大跌，营运基金面临极大的财政挑战。其实，今时今日，时移势易，政府干脆收回营运基金模式，亦未必系坏事！

查实好多国家已经将邮政服务外判、公司化或转为私营，有啲仲有好可观盈利。反观香港邮政在10年前开始连年亏蚀，管理层长期以来由缺乏营商经验嘅政务官员出任。喂，要自负盈亏㖞，即系做生意啦，政务主任系精英，但佢哋唔系生意佬嘛，又点可以期望佢哋同私营企业竞争呢？依种营运基金模式，今时今日已经唔啱使，试咗咁多年冇起色，今日仲要申请拨款，香港邮政饱受批评，既不好受，政府亦面对“长贫难顾”嘅困境！

睇吓其他地方吖，其实都有好成功例子，例如国家嘅中国邮政储蓄银行分行遍及全国乡镇，提供综合性嘅金融服务；至于香港人最钟意比较嘅新加坡，佢哋嘅国家邮政（SingPost）连地产生意都做埋；德国邮政喺1995年私有化之后，更成功成为全球数一数二的国际快递公司DHL。

老实讲，香港邮政员工而家嘅开支（包括薪酬及长俸等），占总开支差不多8成，好难预期依个部门可以喺3年后转亏为盈。当局到今天仍然只系谂攞钱“填氹”，又冇长远规划。咁几十亿使完，唔通3年后又申请拨款咩！计我话，政府当局要考虑嘅系一个长远策略，干脆收回恢复为政府部门，又或者俾佢私营，转为公司化，俾佢系政府架构之外灵活经营商业活动，去补贴亏本的邮递服务，香港邮政私营化自创出路，自寻生机，自负盈亏先至公道嘛！

好勒今日讲住咁多先，下次见！