执法加点人情味更perfect 　文：玮公子

听闻因为大埔宏福苑火灾嘅影响，食环署早喺3个月前已经率先“做嘢”，话“要消除小贩排档区防火隐患”，成立特别小组，通报各区检视小贩档是否合乎规格。当然，如果发现唔规格嘅贩档，就难逃“食告票”嘅厄运嘞！

不过，据闻每个分区处事手法不一，有啲只系提醒劝告，一般而言，小贩都会配合。但有啲区嘅人员就频频出击检控。搞到班小贩心惊胆跳，嗌哂救命！例如湾仔春园街交加街啲小贩，4月中先接到通知，5月13日一个晚上，班制服哥哥姐姐大举出动，话啲档口规格唔啱，连抄50几档，大多数仲系一档抄2张告票。很多小贩虽然已经解释话正在安排工人排期维修，但依然无情讲，照抄可也，班小贩只能徒叹奈何！

本来，喺减低火警隐患嘅前提下，加强防火意识，做好防火规格系好事，但系如果过咗龙就唔系几好啦！嗱，举个例：小贩摊档上盖唔可以有易燃物，咁系啱嘅，但系拆除易燃物都要等持牌嘅铁工匠嚟做架，既然小贩已经讲到明叫咗人嚟拆，咁俾一两日酌情宽限期都唔系过分吖！

又例如，摊档旁边唔可以有上盖遮挡，又不可以同邻边档相连，结果发现上盖有伸出几吋嘅又被抄牌！玮公子明白，依啲上盖如果有易燃物品，一旦着火，可能会造成好似之前花园街火烧连环档惨剧。但系执法系咪可以唔咁tough，采取比较怀柔手段，先警告后执法，大家系咪都舒服啲呢？

另外，根据规定，小贩档嘅上盖，收档之后要将伸出部分缩返入去，但系部分摊档旁侧上盖，10多年嚟饱经风霜，都已经锈蚀到连住个顶，唔可以移动，所以有啲小贩干脆就将佢锯断，以为咁就一了百了啦，点知仍被指因唔符合当局“小贩收档须收回上盖”嘅指令，又要收告票。大家都知啦，今时今日香港嘅小贩，好多都有番咁上下年纪啦，D公公婆婆每晚收档，要危危乎爬上櫈仔，攞枝竹竿去推返个上盖缩入；万一不小心跌伤就唔好啦！

仲有一样野搞到玮公子都好迷惘，就系啲菜档喺过去几十年嚟都系用发泡胶箱装蔬菜啦，唔知系咪宏福苑火灾嘅发泡胶封窗，可能导致场火蔓延咁快嘅原因。当局忽然将发泡胶盒列为易燃物品，禁止晚上存放喺摊档内，就算小贩用铁皮包住卖剩菜蔬嘅发泡胶箱，仍然被抄牌，食告票！大佬，蔬菜喺内地运嚟全部用发泡胶箱啦，蔬菜统营处都系用发泡胶箱㖞，点解佢哋又得，小贩又唔得呢？其实发泡胶箱内装住新鲜蔬菜之外，有大量冰块冰水保鲜，烧唔著㗎！

依家香港经济麻麻，小贩生意难为，仲要日日担惊受怕挨告票，又真系几惨嘅！法律不外乎人情啫，当局执法目的系防患于未然，如果加上少少人情味，咁就perfect喇！