的士司機點解唔可以揸網約車／休會唔係放暑假　文：瑋公子

某日搭的士，司機好健談，係咁揾話題傾計，老實講，如果嗰日多嘢諗，又有嘢趕住處理，就真係冇心情應付佢嘅「熱情招待」喇！

司機講講下講到自己嗰行嘅苦況，佢話網約車出現，的確搶咗好多生意，而揾食艱難左好多。最近政府制訂網約車條例，主要採用網約車平台提供嘅「資料」，咁好容易以偏概全，有唔少情況係冇考慮到的士司機嘅處境！

嗱，好似其中有一項規定，的士司機如果要考網約車牌，就要放棄佢原本已經考取嘅的士司機牌。喂，好唔合理啫，牌照俾咗我咯，又點解無端端收返呢？揸的士就唔揸得網約車，但係網約車夾硬搶咗的士咁多生意又點計呢？

瑋公子聽落好似唔係幾合理，但係喺嗰個moment 又費事駁佢啦，返到公司查下資料，啊，原來係美麗嘅誤會！嗱，係咁嘅，政府嘅規定，為咗公道，的士車主係唔可以申請網約車牌，如果車主同時有的士牌，佢雖然唔可以有網約車牌，但可以用自己嘅的士，加入網約車平台，照樣可以網約。至於的士司機就冇話唔俾佢考網約牌，佢唔揸的士係可以揸網約車嘅！嗰位司機哥哥唔好咁勞氣喇！

咦，話咁快又到七月，立法會仲有一個禮拜就休會。講起休會，公衆成日有個誤解，話立法會放暑假。嗱，依個絕對係美麗誤會，因為休會只係方便議會處理好文件工作，議員基本上冇休息，仲有唔少事務會議要參加，有時仲忙過會期嗰陣。好似今年吖，休會之後就即刻被安排上北京學習10日，立法會主席已經預先爆響口，話返嚟仲有一啲議題要加快處理，可能要加會。所以，今時今日做立會議員好鬼辛苦，唔易做㗎！

以前英國佬年代，唔少議員係鬼佬，佢哋趁休會偷幾日返鄉下探親，所以俾人有個錯覺以為係放假。而家回歸29年喇，仲邊有依支歌仔唱吖，尤其係現屆政府做乜嘢都以結果為目標，咁就要更加勤力㗎啦！我哋尊貴嘅立法會議員又點會例外呢？

好啦，今日又係咁先！