的士司机点解唔可以揸网约车／休会唔系放暑假　文：玮公子

某日搭的士，司机好健谈，系咁揾话题倾计，老实讲，如果𠮶日多嘢谂，又有嘢赶住处理，就真系冇心情应付佢嘅“热情招待”喇！

司机讲讲下讲到自己𠮶行嘅苦况，佢话网约车出现，的确抢咗好多生意，而揾食艰难左好多。最近政府制订网约车条例，主要采用网约车平台提供嘅“资料”，咁好容易以偏概全，有唔少情况系冇考虑到的士司机嘅处境！

嗱，好似其中有一项规定，的士司机如果要考网约车牌，就要放弃佢原本已经考取嘅的士司机牌。喂，好唔合理啫，牌照俾咗我咯，又点解无端端收返呢？揸的士就唔揸得网约车，但系网约车夹硬抢咗的士咁多生意又点计呢？

玮公子听落好似唔系几合理，但系喺𠮶个moment 又费事驳佢啦，返到公司查下资料，啊，原来系美丽嘅误会！嗱，系咁嘅，政府嘅规定，为咗公道，的士车主系唔可以申请网约车牌，如果车主同时有的士牌，佢虽然唔可以有网约车牌，但可以用自己嘅的士，加入网约车平台，照样可以网约。至于的士司机就冇话唔俾佢考网约牌，佢唔揸的士系可以揸网约车嘅！𠮶位司机哥哥唔好咁劳气喇！

咦，话咁快又到七月，立法会仲有一个礼拜就休会。讲起休会，公众成日有个误解，话立法会放暑假。嗱，依个绝对系美丽误会，因为休会只系方便议会处理好文件工作，议员基本上冇休息，仲有唔少事务会议要参加，有时仲忙过会期𠮶阵。好似今年吖，休会之后就即刻被安排上北京学习10日，立法会主席已经预先爆响口，话返嚟仲有一啲议题要加快处理，可能要加会。所以，今时今日做立会议员好鬼辛苦，唔易做㗎！

以前英国佬年代，唔少议员系鬼佬，佢哋趁休会偷几日返乡下探亲，所以俾人有个错觉以为系放假。而家回归29年喇，仲边有依支歌仔唱吖，尤其系现届政府做乜嘢都以结果为目标，咁就要更加勤力㗎啦！我哋尊贵嘅立法会议员又点会例外呢？

好啦，今日又系咁先！