寵物餐廳係德政！跟住就要支持下導盲犬　文：瑋公子

政府發放寵物餐廳牌照，不單止係狗狗主人喜訊，更加令食肆做多咗生意，而最開心係狗狗終於可以陪伴主人，無憂無慮咁入餐廳食嘢。依個係政府嘅德政，反映政府「以民為本」嘅觀念愈來愈強，愈見進步。瑋公子不禁大力擊掌，比個大大嘅讚。當然，社會上仍有唔少人怕狗狗，甚至唔鍾意狗狗，所以政府發牌亦有好多嘅規定，令到狗狗唔會騷擾到其他人。香港一向係個共融社會，大家一定會都識得互相尊重嘅！

現代社會，家庭結構正在改變，寵物狗狗喺家庭地位已經嫓美於家人，佢嘅健康甚至情緒直接會影響成個家庭。瑋公子最近就有一段親身經歷。屋企嘅寶貝女（狗狗）生病，患上非常罕有嘅前庭症候群（Vestibular Syndrome) ，癥狀就好似人類中風咁，半邊身體唔郁得，連頭都抬唔起，仲不受控無意識咁搖動，全身冇力，唔飲唔食！見到佢咁，心入面好難受，佢今年10歲，過去嘅日子就如屋企人一樣，成為我哋最忠誠伴侶。

結果，我哋漏夜送佢急救，夜更當值醫生可能資歷較淺，一時判斷唔到佢患上乜嘢病，以為係骨折，照咗片又唔似係，咁又估係中風，開左藥餵佢食，吩咐我哋返屋企觀察一晚後再打算。依一晚，我哋都冇瞓覺，一直睇住佢呼吸急促，努力對抗病患。第二天，情況唔見好轉，於是又帶佢覆診。日更醫生資歷似乎較深，診症後建議立即注射類固醇，並餵食消炎藥，需留醫3晚觀察。

留醫之後第二朝一早去睇佢，那個小腦袋終於可以微微抬起，佢平時最愛嘅零食，之前本來都唔肯食，依一日，佢終於肯食喇，見到佢努力，見到佢進步，內心嘅喜悅比起中獎還要大。依幾日，見佢慢慢可以企起身，蹣跚行到幾步，然後懂得自己去尿尿便便，就係好安慰！「Thank God」，希望佢快啲康復，重現蹦蹦跳跑嘅狀態。依段日子真係有唔少反思，成日聽人講：「幸福唔係必然」係真嘅，「健康亦都唔係必然」，病毒入侵，器官衰竭隨時殺到，殺你一個措手不及！

提到寵物，突然之間想到導盲犬，佢為眼疾人士提供最專業、最貼心、而且最忠誠嘅照顧，佢同時亦成為依位眼疾人士最信任嘅「親人」。香港導盲犬協會喺2011年成立，嚴格訓練出嚟嘅導盲犬協助數以萬計眼疾人士重投正常生活，居功至偉。仲有呀，導盲犬唔止照顧眼疾人士㗎，佢溫馴聽話，樣子可愛，人見人愛。所以亦都成為咗唔少情緒病人嘅救星。特別係小孩子以及長者，佢哋會為天真嘅小孩子帶來歡樂，令到孤獨的長者得到慰藉。

不過，最近聽聞，好多國際城市嘅政府都有主動撥款資助導盲犬組織工作，唯獨香港依個國際城市冇依項措施，實在有啲遺憾，希望當局能夠對佢哋關顧多啲啦！

好喇，今日又係咁先啦，下次見啦！