宠物餐厅系德政！跟住就要支持下导盲犬　文：玮公子

政府发放宠物餐厅牌照，不单止系狗狗主人喜讯，更加令食肆做多咗生意，而最开心系狗狗终于可以陪伴主人，无忧无虑咁入餐厅食嘢。依个系政府嘅德政，反映政府“以民为本”嘅观念愈来愈强，愈见进步。玮公子不禁大力击掌，比个大大嘅赞。当然，社会上仍有唔少人怕狗狗，甚至唔钟意狗狗，所以政府发牌亦有好多嘅规定，令到狗狗唔会骚扰到其他人。香港一向系个共融社会，大家一定会都识得互相尊重嘅！

现代社会，家庭结构正在改变，宠物狗狗喺家庭地位已经嫓美于家人，佢嘅健康甚至情绪直接会影响成个家庭。玮公子最近就有一段亲身经历。屋企嘅宝贝女（狗狗）生病，患上非常罕有嘅前庭症候群（Vestibular Syndrome) ，症状就好似人类中风咁，半边身体唔郁得，连头都抬唔起，仲不受控无意识咁摇动，全身冇力，唔饮唔食！见到佢咁，心入面好难受，佢今年10岁，过去嘅日子就如屋企人一样，成为我哋最忠诚伴侣。

结果，我哋漏夜送佢急救，夜更当值医生可能资历较浅，一时判断唔到佢患上乜嘢病，以为系骨折，照咗片又唔似系，咁又估系中风，开左药喂佢食，吩咐我哋返屋企观察一晚后再打算。依一晚，我哋都冇瞓觉，一直睇住佢呼吸急促，努力对抗病患。第二天，情况唔见好转，于是又带佢覆诊。日更医生资历似乎较深，诊症后建议立即注射类固醇，并喂食消炎药，需留医3晚观察。

留医之后第二朝一早去睇佢，那个小脑袋终于可以微微抬起，佢平时最爱嘅零食，之前本来都唔肯食，依一日，佢终于肯食喇，见到佢努力，见到佢进步，内心嘅喜悦比起中奖还要大。依几日，见佢慢慢可以企起身，蹒跚行到几步，然后懂得自己去尿尿便便，就系好安慰！“Thank God”，希望佢快啲康复，重现蹦蹦跳跑嘅状态。依段日子真系有唔少反思，成日听人讲：“幸福唔系必然”系真嘅，“健康亦都唔系必然”，病毒入侵，器官衰竭随时杀到，杀你一个措手不及！

提到宠物，突然之间想到导盲犬，佢为眼疾人士提供最专业、最贴心、而且最忠诚嘅照顾，佢同时亦成为依位眼疾人士最信任嘅“亲人”。香港导盲犬协会喺2011年成立，严格训练出嚟嘅导盲犬协助数以万计眼疾人士重投正常生活，居功至伟。仲有呀，导盲犬唔止照顾眼疾人士㗎，佢温驯听话，样子可爱，人见人爱。所以亦都成为咗唔少情绪病人嘅救星。特别系小孩子以及长者，佢哋会为天真嘅小孩子带来欢乐，令到孤独的长者得到慰藉。

不过，最近听闻，好多国际城市嘅政府都有主动拨款资助导盲犬组织工作，唯独香港依个国际城市冇依项措施，实在有啲遗憾，希望当局能够对佢哋关顾多啲啦！

好喇，今日又系咁先啦，下次见啦！