政是政非 ﹕少數中的大多數

政圈之中趣事日日新鮮日日金，可以話多不勝數。阿爺扑鎚現屆立法會玩多一年唔係幾好囉，有人本來執定包袱退引江湖咯，冇啦啦又再坐一會，多幾百萬落袋，簡直要謝主隆恩啦！尤其有幾個泛民議員本來被迫退位讓後生嘅，而家可以大大聲咁話：「嗱嗱嗱，唔係我霸住個茅廁唔拉屎呀，係阿爺叫我留低咋，咪詐型呀！」斷估班後起之秀都唔會話No卦！

點知攬炒派又唔妥喎，鼓吹總辭同阿爺唱反調。咁就搞死班泛民議員啦，大拿拿幾百萬點捨得呀，但唔總辭又怕得罪攬炒派，前幾個月先至話同佢地齊上齊落，而家唔總辭，會俾人話見利忘義喎！點呢？經過一場腦交戰，有人諗出條橋搞公投，將個波交俾公眾，由大家決定。不過，大家都知，而家疫情咁嚴重，搞公衆活動，要咁多人搵命搏幫佢地做決定，鬼睬你咩！咁公投未必搞得成噃！如果唔成，仲好。佢哋就可以推得一乾二淨，大聲咁講：唔係唔想問大家㗎，而家係個天阻住晒咋！

不過，依條橋都未夠功能組別會計界嘅昌哥高，佢一早已經喺業界做民調，問下支唔支持佢留任一年。民調只做咗兩日，業界反應又麻麻，佢只收番大約百分之15嘅問卷，點知就急不及待話有百分之52支持佢延任喇，幾咁理直氣壯呀，好過搞乜鬼公投啦！喂，有人問，咁都得？收番唔夠兩成問卷咋喎，只不過係少數中嘅大多數，邊夠代表性呀？嗨，依位哥哥，你太年輕喇，而家依個年代，冇話唔得㗎，只要目標清晰，你不擇手段，夠大聲，臉皮夠厚，做乜都得㗎！你睇吓，佢唔係得咗囉！

資深媒體人

瑋公子