政是政非 ﹕少数中的大多数

政圈之中趣事日日新鲜日日金，可以话多不胜数。阿爷扑锤现届立法会玩多一年唔系几好囉，有人本来执定包袱退引江湖咯，冇啦啦又再坐一会，多几百万落袋，简直要谢主隆恩啦！尤其有几个泛民议员本来被迫退位让后生嘅，而家可以大大声咁话：“嗱嗱嗱，唔系我霸住个茅厕唔拉屎呀，系阿爷叫我留低咋，咪诈型呀！”断估班后起之秀都唔会话No卦！

点知揽炒派又唔妥㖞，鼓吹总辞同阿爷唱反调。咁就搞死班泛民议员啦，大拿拿几百万点舍得呀，但唔总辞又怕得罪揽炒派，前几个月先至话同佢地齐上齐落，而家唔总辞，会俾人话见利忘义㖞！点呢？经过一场脑交战，有人谂出条桥搞公投，将个波交俾公众，由大家决定。不过，大家都知，而家疫情咁严重，搞公众活动，要咁多人揾命搏帮佢地做决定，鬼睬你咩！咁公投未必搞得成噃！如果唔成，仲好。佢哋就可以推得一干二净，大声咁讲：唔系唔想问大家㗎，而家系个天阻住晒咋！

不过，依条桥都未够功能组别会计界嘅昌哥高，佢一早已经喺业界做民调，问下支唔支持佢留任一年。民调只做咗两日，业界反应又麻麻，佢只收番大约百分之15嘅问卷，点知就急不及待话有百分之52支持佢延任喇，几咁理直气壮呀，好过搞乜鬼公投啦！喂，有人问，咁都得？收番唔够两成问卷咋㖞，只不过系少数中嘅大多数，边够代表性呀？嗨，依位哥哥，你太年轻喇，而家依个年代，冇话唔得㗎，只要目标清晰，你不择手段，够大声，脸皮够厚，做乜都得㗎！你睇吓，佢唔系得咗囉！

资深媒体人

玮公子