政是政非 ﹕五斗米岂同300万

古有陶渊明：不为五斗米折腰。风高亮节，流芳百世。不过，今时今日依种骨气，用把口讲吓，呃下人就得，真系要做？儍仔，唔驶揾食咩！钱㖞，点会嫌多㗎！

系囉，又系讲紧𠮶班扭尽六壬，睇吓点样先至可以留任一年又可以自圆其说嘅泛民议员囉。依排佢哋又话公投，又搞民调，为咗万无一失，夹埋班所谓嘅学者，喺民调上面又加两条门槛保佢哋入闸，利之所在，原来乜鬼道德呀、人格呀、甚至尊严都可以唔要！真系好鬼肉酸！

反而佩服叶太，佢闹人的确有point，而且有哂数据。佢同泛民计咗条数出嚟，话泛民留又难，唔留又难㖞。不过，我睇咗条数，泛民嘅意向，就一目了然啦！叶太条数系咁计嘅：每位立法会议员每月薪津101,000元（双料议员会扣三分一），一年即系1,212,000元；任满酬金是总薪津的15%，原先四年任期的任满酬金是727,200元，延任一年的任满酬金则有181,800元；另外，仲加医疗津贴每年35,180元、酬酢及交通开支每年221,310元，及实报实销营运开支每年约2,770,970元。
佢又话，而家“决定”议员延任一年，任满酬金系先结算首四年？还是待整个第六届任满后才一次过结算？就必需留待立法会行管会决定。不过，既然第六届延任一年，佢哋认为待任期届满后才一次过结算较为合理。

嗱嗱嗱，个point就系依度嘞，如果真系咁计算，唔留任嘅议员就会失去共909,000元任满酬金，额外一年的薪津1,212,000元、及医疗酬酢营运开支津贴共3,027,460元。喂，大佬，300几万㖞，唔系讲笑嘛，今时今日无惊无险揾300几万，咁易咩！陶渊明都系五斗米啫，而家几百万又点忍得手呀？风高亮节依家嘢，迟啲啱时机，先再攞出嚟呃下人啦，而家就侧侧膊袋咗先囉噃！

资深媒体人

玮公子