政是政非 ﹕反对派延任一年就唔该咪玩嘢

依个世界，有时好多事情都可以心领神会，唔驶样样嘢都要画公仔画出肠嘅。正常谓无声胜有声嘛！嗱，睇吓批反对派立法会议员，上星期唔系就乖乖地齐齐去开立法会内会囉，乜鬼总辞呀，公投呀，民调呀！唉，忘记佢啦，大家侧侧膊，唔多觉，系咁就过骨囉！嚟紧一年，齐齐延任，睇怕都冇乜悬念喇！

问心讲，过去𠮶届立法会，反对派议员玩嘢多个做嘢，尤其被个社会运动牵住鼻子走，行为意识不自觉咁越玩越激，冇啦啦变咗揽炒派！公文袋就系例子啦，本来好地地系有学识修养之士，无端端谂埋一边愈来愈徧激，专搞对抗不务正业，终于玩到过哂火位，想煞车扭呔，都嚟唔切！因缘际会，现届立会议员延任至少1年，对班反对派议员嚟讲，真系菩萨显灵喇，除咗一年又多几旧水落袋，仲俾咗个好好嘅时机佢哋重回正轨，做翻多啲好事啦，咪玩嘢喇！

嗱，喺疫情咁唔稳定之下，社区里面有冇隐藏传播者真系好难揾㗎，全民大测试系一个最可靠而快捷揾到隐藏传播者的方法之一，而政府又动用咁大人力物力，阿爷提供资源，派大队人马落嚟撑场，可谓用心良苦，虽然大测试嘅实际効用有几大，仍然好多争议，但做咗点都好过唔做啩？既然钱都驶咗咯，验下亦无妨吖，至少自已可以安心啦！但真系吹胀，有几个反对派立法会议员又徧徧玩嘢嘞，扮哂有型唱反调，话评估过接受测试作用唔大，而且验完都有可能会被感染啦，所以索性唔去验咁话㖞！

喂，大佬呀，你哋咪害人啦.。攞啲咁嘅歪理呃人，边有话担保你唔会感染㗎，如果咁坚，全世界都嚟揾香港帮手啦！乜做咗测试就可以保证唔会被感染咩？咁你做完癌细胞测试，医生话你冇事，又可唔可以保证你唔再生癌呀？简直废话连篇！你哋唔测试系你哋嘅事，咪怂恿人哋唔参加嘛！如果有人真系隐性传播者，听咗你讲唔去测试，喺个社区继续传播，你系害死好多人㗎！积吓阴德啦，求神拜佛你哋唔好中招呀，如果唔系，你又唔去騐，冇人知，系咁喺个社区播毒，真系多得你唔少呀！呀尊贵议员，凡事都要两面睇，道理唔会永远喺你𠮶边㗎，醒啲啦！

资深媒体人

玮公子