政是政非﹕交通補貼不如諗計降低交通費

香港交通費高昂，真係世界聞名，無他嘅，因為個政府唔想落本錢去搞交通設施，氹啲企業落水之後，要保障企業嘅合理回報，又要崇尚自由經濟，所以交通收費訂到鬼咁高，政府都冇say！苦就苦在升斗市民被迫要俾貴交通費都無可奈何！谷谷埋埋啲怨氣無從抒發，咁，又變咗係另一個造成深層次矛盾嘅誘因囉！其實，只要個政府肯承擔多啲，嗰局面就會好唔同！

香港人其實好忍得㗎，喺太平盛世，大家仲揾到啖食嘅時候還可以忍氣吞聲，但係到個經濟唔掂，大把人失業嘅時候，個個都㩒住荷包計到盡，慳得一蚊得一蚊，咁就金睛火眼算到足啦！其實依兩年香港嘅環境真係麻麻，去年社會運動已經搞到元氣大傷，好多人已經失業，特別係年過60歲，接近退休年齡嗰班人，首先就俾人開刀！喺咁現實嘅香港地，年紀大係原罪，佢哋被炒之後要揾番嘢做，難過登天。政府將支援長者嘅年齡定喺65歲，但係對60至64歲嘅人就毫無支持！舊年疫症未嚟之前，特首體會到依班人嘅苦處，宣布將提供俾長者嘅「2蚊全港乘車優惠」擴展到60歲。其實依個係一個「德政」嚟㗎，點知上有政策、下有對策，啲福利官員唔知係陽奉陰違抑或唔想做，諸多藉口話搞下諮詢，又搞吓程序，一拖又咗一年有多，到今日都未實行！

最近，傳媒收到風，話依個方案俾行政會議成員阻行，仲話可能取消添！喂，有冇離譜啲呀？行政會議會究竟有冇理吓人感受㗎？夾硬將特首個「德政」閹割咗，累到特首孭鑊，你哋又於心何忍呢？點講都唔通啦！有局內人話，其實政府都好頭痕，一場疫症令到庫房失哂預算，救旅遊，又救主題公園，要補就業，又要救零售，駛咗好多錢！最弊個疫症隨時再爆，唔知要駛多幾多錢？真係無底深潭㗎！「長者2蚊乘車優惠」舊年都用咗14億，如果擴展到60歲，保守估計要用多6億幾，所以慳得就慳囉！

計我話，對個政府嚟講，幾億濕濕碎啦！特首一諾千金，誠信至重要吖嘛，豈可反悔呢！政府近年都大拿拿駛咗唔少錢啦，慳咗依幾億，失咗民心，唔值得吖！況且，政府要補貼咁多錢，係因為交通費貴，今時今日香港交通費咁貴，政府其實唔係冇辦法㗎，問題係肯唔肯做啫！有高人建議過政府回購港鐵，減車費就即時立竿見影嘞，亦係一個唔錯選擇吖！交通費平番咯，補貼就自然唔駛咁多啦！總之一句，解玲還須繫玲人，依個局點拆，就要考下一衆高官嘅智慧喇！

資深媒體人

瑋公子