政是政非 ﹕摆明僭建都唔敢拆 究竟惊乜？

“只许州官放火， 不许百姓点灯”依一句话，用嚟形容公文袋嘅毛姨姨其实好适当，因为佢自己犯规就当睇唔到，而人哋犯规，佢就嘈喧把闭！而家有人倒返转头咬住佢唔放，佢就话人无聊！唉，今时今日啲立法会议员，点解啲质素会低到咁㗎？真系情何以堪囉！

前特首CY个基金，最近真系好神勇，除咗揼本悬红鼓励揽炒派“笃灰”之外，最近系咁咬住毛姨姨住宅僭建单嘢唔放，一定要毛姨姨有错就要认，仲要企定定。CY今次好坚，攞到屋宇署回复一名市民投诉毛姨姨间屋僭建嘅覆函副本，证明毛姨姨间屋个车房，僭建改为住宅用途，根本系违规，仲要求毛姨立即清拆，恢复原状。咁，即系踢爆有人死口话自己冇僭建，其实一直系欺骗市民，擘大口讲大话！嗱，大家睇吓屋宇署封信嘅内容啦，上面大大只字，讲明毛姨姨住紧间屋系违规㗎：“屋宇署已经发信予有关业主，指明有违反《建筑物条例》的情况并提醒业主尽早恢复有关处所的原有用途。如情况未有改善，处方会采取进一步跟进行动”。

有咗依封信，犯规嘅人应该冇得抵赖喇挂！CY打蛇随棍上，追问毛姨姨点解唔公开解释佢认为自己寓所冇违反《建筑物条例》？点解唔理屋宇署的要求，唔立即清拆僭建物，恢复原状？正所谓“平生不做亏心事、半夜敲门也不惊”如果毛姨姨真系冇错，咁就理直气壮攞出证据公开辩解啦，驶乜闪闪缩缩，仲逃避记者追问，被人追到嘞，就侮辱人哋，话人哋唔系记者呢？嗱，依单嘢佢真系丑态百出，犯众憎到痺！喂，毛姨姨，无论任职乜嘢政治立场嘅新闻机构都系记者，你把口就大大声话尊重新闻自由，行动你就封杀新闻自由。你质疑人哋“系咩嘢记者”即系系你心目中早有把尺，自己友先认系记者，得唔得13岁?仔孭住个相机你都系记者！唔系自己友你就话人哋唔系记者，唔止唔答人，仲轻佻侮辱人哋！咁，你点尊重新闻自由呀！咪以为识讲几句英文，就将自己摆到高高在上啦，你嘅所作所为，真系愧为曾经做过新闻工作者喇！

公道自在人心，当日毛姨姨喺立法会，针对高官名人被揭有违规僭建物，哗，几咁义正词严呀！自己犯上同样错误，就扮唔知！有证有据嘞，官方出埋信嘞，就唔理！真系完美表演咗乜嘢系“有口话人、冇口话自己”，乜嘢系“待人以严、待己以寛”啦！不过，最令公众气愤嘅，系有关部门嘅无能表现！毛姨姨单嘢，先系由传媒踢爆，结果见哂报嘞，有关部门只系出封信，警告下就了事，毛姨姨梗系一于少理，睬你都儍啦！过咗几年，又有市民投诉嘞，部门又系咁意巡查下，又出封信警告算数，依然冇行动！而家前特首都出声喇，部门仍然系乜都唔做！真系搞到人火都嚟埋！喂，官员呀，究竟你哋系懒吖，抑或怕咗某啲人嘅恶势力呢？细佬哥都识啦：天子犯法都要与民同罪嘛，更何况依个只不过系区区一个不知所谓嘅“民意代表”啫！喂，你哋系官嚟㗎，有人犯规，就要执法啦，有乜好怕呀？又系𠮶句囉：“为官避事平生耻”，你哋系职责所在，冇得避㗎！

资深媒体人

玮公子