政是政非 ﹕法官冇王管又点有公正审判

早𠮶排，社会好有兴趣咁争论：究竟本港系唔系三权分立？搞到政府官员同埋法律专家频频解话。其实，正如本栏之前都讲过，自开埠以嚟，香港从来就未试过三权分立。殖民地时期，立法会议员全部由港督委任，摆明就系行政主导；而终审法院放喺英国，亦都系话到明，最终权力喺“宗主国”，亦即系英国。好嘞，而家大家总算明白啦，就嗌都无谓喇！

不过，话时话，行政、立法、司法唔系分立，但有互相监督，互相制衡嘅作用。但系司法独大，欠缺监督，就系本港一直存在嘅漏洞。政府可以日日被人闹，立法会议员亦都可以被DQ，但喺以前，有冇人敢狠狠咁去闹法官！因为佢哋有个光环喺头顶，设定必系品格高尚，思想健全、大公无私嘅！而且法官仲有把尚方宝剑喺手，话你唔尊重佢分分钟告你藐视法庭！当然，告藐视法庭要有一定法律理据，但系市民大众都系一知半解，为免踩地雷，所以对法官嘅批评就可免则免啦！至于法官本身，由于要保持独立性，佢哋亦都避免广泛社交，保障判咗案公正，逐渐令公众对佢哋嘅印象，充满神秘感！

嗱，世事嘅嘢就系咁嘞，搞搞吓法官就变咗自成一国，佢哋有佢哋嘅文化、交际圈子、同埋游戏规则，人哋也懒得去理，就算想理亦都唔知点理！其实，无所谓嘅，如果佢哋嘅工作唔影响他人，边个得闲去管佢吖，正所谓，你有你嘅生活，我继续我嘅忙碌吖嘛！之但系，法官系要判案㗎噃，佢嘅判决，系影响人一世㗎噃，有乜差池，𠮶个人嘅人生就此玩完！所以，如果个法官情绪唔好，精神有问题，又或者内心深处有偏见，都会影响案件嘅公正性。其实都几令人担心㗎！

法官都系人，都会有病，有情绪，亦都有七情六欲，一旦情绪欲望战胜理智，判断就有偏差。举个例子，应该有30几年喇，本港有个犯人，连续两次因涉嫌贩毒被捕，佢喺法庭受审𠮶时，咁啱又遇上同一个法官，结果两次都被判罪成，但系只需罚款1蚊。嗱，你哋会问：有冇搞错呀，𠮶官痴咗线咩？系呀，估啱咗，后来真系发觉个法官原来真系患上精神病！系咪好得人惊呢！

最近，大家有冇发觉到律政司喺法官判案之后，要求重审、判刑复核嘅事件多咗呢？系囉，即系话，上述大家所担心嘅事可能已经正在发生嘞！回心一谂，喺咪系时候好好检讨一下现行对法官嘅监管机制呢？制度有漏洞，及早堵塞，先会持之以恒，逃避，始终唔系办法，大家真系要好好思考！

资深媒体人

玮公子