政是政非 ﹕阿爺做嘢點會俾你估到

啱啱過咗嘅禮拜六，人大未如所料，將本港改革區議會嘅內容放入明年3月常委會議程上，搞到有啲人好失望，但亦有人暗暗叫喜，心諗，唔通阿爺遇到阻力，有所顧忌唔敢做？如果係咁，班攬炒派區議員睇嚟又有生機囉喎！

究竟係咪咁呢？嗱，首先，阿爺今時今日喺香港做嘢，已經冇乜需要顧忌，亦冇乜嘢係唔敢做。政圈有句話充滿玄機：政治一日都嫌長。即係話，詭異嘅政治唔係咁易睇得通，而且變數好大，你愈以為理所當然的事，往往就出人意表。好似依次咁，政圈傳到咁行，連班搞搞震嘅攬炒派都打定輸數，出哂口術要「變陣」應戰咯，點知竟然冇嘢發生喎，吹脹咩！

梗係啦，阿爺諗嘅嘢，布嘅局咁易俾人睇穿咩！有啲嘢其實估估下，出嚟嘅效果仲好啲添。據有個高人講，改革區議會依單嘢，阿爺勢在必行㗎喇，方案擺咗喺度，隨時交人大常委討論。之不過，而家距離明年3月仲流流長，駛乜咁快公布內容，俾班友仔說三道四呢？而且政治形勢日日唔同，有好多細節仲可以慢慢深化，又何必急嗰一時，咁快話講哂出嚟呢？

既然係咁，點解先前又漏咗啲消息出嚟呢？嗱，依啲就係政治嘅藝術嘞，大家記得英國佬管治香港殖民地時期常用嘅「放政治氣球」技倆嘛？一啲重大政策決定之前，港英政府會先透過一啲特定嘅「可靠消息人士」透過媒體放下風，睇吓社會反應，經過調整之後先至推出。究竟依一次係咪阿爺「放氣球」？咁大家自己估吓嘞！

係嘞，啱啱提到攬炒派，佢哋最近大大聲話要搞個「香港公民議政平台」，真係得啖笑！唔知係咪收到風阿爺要郁佢哋，就嚟冇區議員做嘞，就快快脆脆搞個平台做據點，以為咁樣可以挑戰阿爺底線！唉，莫講同阿爺玩嘢，根本未夠班啦，佢哋身為區議員，成立一個咁嘅組織，係犯法㗎，仲大鑼大鼓咁宣揚，隨時拉得啦，簡直白痴兼低能！你哋話啦，香港政治發展，將來由依班二打六嚟搞，前途會點？冇眼睇囉！

資深媒體人

瑋公子