政是政非：香港清零 由我做起

天寒地凍，黃昏條街啲舖頭已經閂晒門，真係倍覺淒清！唉，日日仲有幾十單確診，個疫症唔斷尾，政府就唔會放寬限聚令，亦唔會通關，個市冷清清咁，仲邊度有運行吖？香港一日唔清零，都唔會有好日子過！老實講，事到如今，喺疫苗未到之前，防疫措施官方已經做到盡㗎喇，想更加有效果，就真係要全港市民合作，由我做起。

咁應該點樣做呢？其實好簡單，只要人人肯花少少時間，依時依候去做檢測就得啦！而家政府開咗咁多個免費檢測中心，又喺地鐵站免費派發測試樽，方便到不得了，只要每個人每星期做一次，既可以保障自己健康，如果唔好彩有事咯，可以即刻求醫。當局又立即可追到源頭，截住散播，百利無一害！有位朋友，佢真係咁做㗎，佢仲費事增加公共衛生服務負擔，自己俾錢去做測試。佢話：花兩百幾蚊就知道自己無事，又唔怕惹到屋企人，仲叫埋屋企人一齊去做測試，雙重保險之下，個個安心，精神壓力都少好多添。係呀，依位仁兄向來活躍，本來日日happy hour，晚晩有飯局，而家酒吧唔開，夜市又冇咗，本來有啲頹！之不過，佢將自己依個做法，叫哂所有朋友去做，一股正能量周圍散播，得到好多人嘅認同，填補番佢唔少失去社交活動嘅空虛。

嗱，人就係咁㗎嘞，當見到曙光，有咗希望自然就會開心好多。試諗下，如果全香港市民都好似依位仁兄咁正能量，咁咪好快望見家鄉囉。明嘅，人係有惰性嘅，而且鍾意揾藉口，唔係死到臨頭都唔肯蝕底少少，所以，要犧牲返工或者休息時間做檢測，咁鬼麻煩，咪搞啦！又時時有種僥倖心態咁諗：六合彩又唔見我中，邊會咁好彩俾我揩到嘢吖？於是，明明街口有免費檢測，行兩步就可以做都唔做！然後揾藉口話自己唔係唔想做，係鬼咁忙囉！話俾大家知吖，依隻新冠肺炎唔睇得小㗎，歐美輕視佢搞到咁大鑊，你哋唔係睇唔到嘛？就連內地，本來已經幾乎搞掂嘞，點知河北石家莊最近就係少少鬆懈啫，又搞到一鑊泡喇！正所謂：好嘅唔靈醜嘅靈，六合彩唔嚟揾你，但係個病毒就偏偏遇上你！咁你又吹脹咩！

所以，自己定期做測試，主要係為自己呀！保障自己又可以同時為防疫出吓力，利己又利人，何樂而不為呢！話時話嘞，作為僱主嘅亦都應該支持下僱員嚟做依件事，好理解有啲僱主唔方便俾員工在家工作，但俾佢哋返工遲些少，或者放工早少少去做免費檢測，睇怕都唔會令佢哋好大損失掛？況且，員工健康返工，對公司亦有保障吖嘛，係咪？嗱，總之都係咁話啦，香港要及早清零先有得救，如果要清零，人人就要「由我做起」，發揮團結合作力量，我哋好快就見到光明。

資深傳媒人

瑋公子