政是政非 ﹕全民一心 配合围封小区检疫

依舖真系㷫过火屎嘞，今日啲记者啲质素点解真系会差到咁㗎？讲紧乜？咪就系讲紧油麻地佐敦围封囉，班记者喺围封之前，就入住咗封锁区嘅宾馆，亲身体验被围封居民强制检测嘅真实情况。点知港台𠮶位记者好做唔做，竟然话被围封之后，居民收到嘅物资净系得杯面同埋罐头㖞，仲质疑当局安排不足，无提供罐头刀同埋煑食工具㖞！

据知，被围封嘅居民，获派发嘅物资，有蒸馏水，饮料、蛋糕仔、水果、仲有港人至爱嘅罐头豆豉鲮鱼同埋茄汁豆添。喂，依啲食物摆到明就系俾大家急就章顶住先㗎啦，杯面用滚水渌下就食得啦，罐头全部系易拉环，一拉就开㗎㖞，乜蛋糕仔，水果要煑熟嚟食咩？港台个记者系咪被纵惯呢？谂住好似贾宝玉咁，饭来张口，水来湿手，喂埋你食先至满意呢？咁煞有介事咁话当局冇安排煑食工具，唔知系咪佢唔识用热水渌杯面，抑或连易拉环都唔识用吖，定系佢钟意煑熟啲蛋糕同水果嚟食呢？不如蒸条东星斑，整煲佛跳墙俾佢食好唔好呀！

老实讲，当局提供依啲食物，用嚟顶48小时嘅围封，快快脆脆完成检测就解封囉，依啲物资系咪足够呢，就见仁见智啦，但唔够食咪再去攞囉，冇人唔俾你再攞嘛！大家都知啦，围封强制检测系迫不得已嘅措施，大家都想香港好，咪合作啲，忍耐一下囉！疫情至今刚刚一年，本港染疫已经过万宗，我哋唔可以再拖㗎喇，政府果断围封小区，强制居民检测，系要本港尽快达到清零目标，早日通关，复苏经济。

大家知㗎，围封小区唔系一件简单嘅事嚟㗎，除咗民政事务局同食衞局系主力之外，五大纪律部队所担当嘅支援更功不可没，仲有其他部门人力物力资源配合，可以讲系对政府一次空前最大考验。而且，围封小区好有可能仲会更多，系一场漫长嘅战斗嚟㗎！冇错，政府资源、人力物力都多，但唔系万能，任何嘅措施，特别系好似围封小区强制检疫依啲大Project ，几咁周详都有不足，大家发现问题咯，咪即刻改善囉！作为市民，应该好appreciate一班不眠不休工作人员嘅服务精神同埋辛劳工作，俾佢哋多啲支持鼓励。好似𠮶位港台记者咁鸡蛋挑骨头，扯后腿嘅心态，实在真系要不得嘞！

资深媒体人

玮公子