政是政非 ﹕咪移民英国做二等公民

香港依排又兴起“移民”依个话题，英国佬搞BNO5+1，睇落好似系移民英国嘅好机会，但系英国佬边有咁好死呀，俾佢算过度过，睇穿佢龙嘢，只不过系想吸人才兼吸钱嘅诡计啫！土生土长嘅香港人，带埋副身家过到去，适唔适合呢？如果顶唔住又点呢？真系要谂清楚呀！

移民真系唔简单㗎，有啲人以为适应下气候，改变下生活环境，揾到份工就搞掂，其实仲有好多生活上嘅细节问题，先至最难挨！就以一个过来人身分同大家分享下啦：首先，语言系一个好重要嘅问题，无论你英文有几好（何况唔系个个香港人都咁好英文），始终都叻唔过鬼佬卦，你一出声，就一定有口音，俾人知道你唔系地道咯，即系唔系自己友啦，咁你就有可能遇上唔公平对待喇！系呀，咪以为鬼佬一味话尊重人权，就唔会歧视你呀！你始终唔系自己人，点会一视同仁吖！嗱，就算你真系冇语言嘅问题，但一定顶唔顺𠮶度嘅工作效率同埋节奏。香港人讲求效率，乜鬼嘢都要快，一日可以做几件事。不过去到𠮶度，个个慢条斯理，你急咩，I am sorry 囉！Take it easy 啦！

仲有呀，人最需要嘅系朋友，要有共同话题，去到𠮶边就算俾你识到朋友，关系都好似隔咗万重山咁，倾唔埋栏㗎！因为大家文化背景唔同，又冇共同经历，即使俾你哋发掘到共同兴趣（例如英超足球），都冇咁过瘾啦！不过，你可能会谂，挨下啦，明天会更好嘅，顶唔顺先算啦！嗱，喺以前可以咁谂，因为仲有回流依个选择，但系而家如果你真系信英国佬嘅BNO5+1，就系一条不归路，返唔到转头㗎喇！到时你只能够硬住头皮，继续委屈自己黯然咁度过余生啦！

英国佬计过数，估计有数以十万计香港人移民英国㖞，佢哋个算盘就打得响嘞，以为今次执到宝！计我话，诡计多端嘅英国佬依次计错数啦，香港人咁鬼叻，边会咁儍仔吖，香港始终系我哋嘅屋企，有乜嗌霎自己屋企人四四六六拆掂佢啦，有乜风雨咪一齐去挡囉，移民去到𠮶啲山旮旯地方，有起事上嚟，叫天不应，叫地不灵，咪搞喇！

资深媒体人

玮公子