政是政非﹕ 要人哋尊重你先要你尊重人

仲有幾日就過年喇，瑋公子喺度首先同各位讀者拜個早年，恭祝大家新春大吉，平安喜樂！更加期望疫情快啲過，香港快啲回復正常生活。係呀，過去一年有多，市民嘅生活好唔正常！限聚令搞到人人幾乎零社交；封閉公共場所，搞到打麻雀呀、唱卡拉ok呀，揼骨呀都冇埋，就連睇場戲咁低嘅要求都冇得傾，真係唔病死都悶死。最慘係班學生哥，返唔到學，運動場又閂晒，日日困喺屋企視像上堂，眼都朦又冇運動，遲吓可能仲變咗大近視添！

所以，回復正常生活好重要，而學生返學更加係重中之重啦，依個唔止係學生嘅期待，仲係好多家長嘅心聲，啲家長要揾食，又要顧住冇學返嘅仔女，顧得東嚟又顧唔到西，真係人都癲！最近，本港教育局就提出咗個方案，俾啲校長考慮吓實施嘅可行性。個方案就係：「若果嗰間學校嘅全體教職員，每14日做一次核酸檢測，就可以向當局申請容許全部學生回校上半日課。」點知個方案內容剛出，部分校長同埋教師團體就即刻「起哂鋼」，話當局將啲教師做磨心，唔尊重佢哋嘅專業，事前冇諮詢過佢哋喎！

喂，教育官員都講得好清楚啦，依個方案並唔係將來全面復課嘅條件，亦唔係對學校嘅要求，唔希望對任何人構成壓力，亦唔想校長感到有壓力要迫老師檢測。官員仲話，局方嘅立場一向係鼓勵所有人自願做檢測添。咁，即係話，個方案係攞出嚟俾大家試行，唔係指標啦！呀校長，呀老師，大家都係受過敎育嘅知識份子，都應該明白事理吖，乜鬼嘢你哋都話要諮詢，咁，你哋自己係咪都咁做呢？你哋而家批評官員，講依啲說話之前，又有無諮詢所有教師校長呢？喂，你哋話官員唔尊重你哋嘅專業，但係你哋又有無尊重官員經過深思熟慮，權衡各方利益之後，所做嘅專業判斷呀！

香港人好鍾意比較外國，部分人仲時時覺得外國嘅月亮特別圓，放督屁都係香嘅，成日乜嘢都同人比，嗱，不如睇吓美國嘞，係依一個疫情，美國係重災區，防疫抗疫做到一坺屎咁，但當地政府仍然認為應該盡快俾學生復課。因為佢哋都知道，學生長期唔返學，衍生出嚟嘅問題，可能會好大鑊，所以，佢哋最近已經部署緊初級至第八班嘅學生返學校上課呀！咪以為佢哋已經控制好疫情先至咁做，其實，美國最近單日新增感染人數雖然有回落跡象，但係就有研究話，英國流行的變種新冠病毒，正喺美國加速傳播，感染率較一般新冠病毒高至少三成，預料依個變種病毒大有可能喺下月前，成為美國最常見嘅病毒株。

嘩，咁危險仲要復課？如果喺香港，教育官員實俾人鬧爆啦！唔止咁呀，白宮新冠疫情首席顧問福奇仲話：「政府（美國）嘅支援方案通過之後，學校復課就更加好辦嘞，而首要嘅就係幫所有教師盡快接種疫苗。」哈，美國都係教師先行喎，唔知點解佢哋啲教師又咁順攤嘅？唉！人比人比死人，都係唔講人哋喇，講番香港啦，最近疫情已見有啲回落，證明香港人團結就是力量，特首尋日都話，如果疫情再穩定一啲，有望逐步放寬限聚令，香港市民好快可以回復正常生活嘞！所以，都係嗰句啦，大家只要保持警惕，做好防護措施啦。疫苗如果可以如期嚟到，大家打埋疫苗，好快度過難關啦！

資深媒體人

瑋公子