政是政非 ﹕撑完善选举制度　抗疫就要打疫苗

社会最近新鲜滚热辣嘅话题，政治方面，当然系全国人大通过“完善香港选举制度，实行爱国者治港”啦，而民生嘅话题，始终系“究竟打唔打疫苗好呢？”

先讲人大单嘢，好多香港人就话，阿爷只手伸得咁入，一国两制依趟玩完啦！嗱，任何事都有前因先至有后果。一国两制系阿爷为香港度身订造嘅，一定希望能够行稳致远。香港人要求嘅政制改革同全面普选，阿爷亦都应承可以逐步实现。不过，先快条件系因应时局发展同埋社会形势嚟决定进度，阿爷并无既定时间表。之但系，一班自称泛民嘅仁兄，就要将一套连西方社会都冇办法实施嘅政制标准套入香港，不但要阿爷接受，仲要一步到位，争取唔到就话阿爷破坏一国两制，煽动学生、民众参予黑暴，无视法治，破坏社会秩序，超越哂大部分香港人嘅底线！阿爷先至忍无可忍，唯有出手！

有个比喻其实几贴切㗎：“阿妈买咗包糖俾阿仔，一心都系想佢高兴。不过，一次过成包糖俾哂佢，怕佢冇节制系咁食会坏牙，所以俾住一粒先啦！阿仔唔制扭计，阿妈于是俾佢两粒啦，仲话如果佢乖乖地，一阵再俾佢两粒，甚至更多！点知阿仔点都唔制，系都要成包，唔止蹬地大叫大闹发烂渣，仲打烂玻璃，掟烂哂屋企啲嘢！阿妈于是收番哂佢啲糖，阿仔结果一粒都冇，仲要罚企，饭都冇得食！”大家睇完依个故仔，系咪熟口熟面呢？

讲番民生嘞，最近全球都开始打疫苗嘞，但系咁多只疫苗打边只好呢？又真系几伤脑筋！最弊系只只疫苗都有死亡个案，搞到啲人个个患上有“打又唔系，唔打又唔系”嘅选择困难症，于是就抱住“睇定啲先”嘅心态啦！咁，香港人自愿接种疫苗嘅数字，自然就唔“靓仔”喇，而更加弊系依种“冇疫苗就盼疫苗，有疫苗又唔去打”嘅情况，大大减低咗本港嘅抗疫成果，亦令到我哋想通关，想重振经济嘅愿望幻灭！

计我话，香港人真系唔驶咁惊㖞，正如专家袁国勇话斋，日日都有死亡个案，不过近日嘅死者咁啱又打咗疫苗，所以个数字睇起上嚟好似好得人惊，而且，𠮶啲话打咗疫苗死亡嘅人，大部分都系长期病患者，未必关疫苗事㖞！其实边啲人唔适合打呢，当局都列哂出嚟啦，正正常常嘅人又有乜好惊呢！

资深媒体人

玮公子