政是政非 ﹕瓜田李下唔避忌 次次咁好彩咩

正所谓：长江后浪推前浪，一代新人换旧人，每一个年代都会有一啲代表性人物被封为偶像。娱乐圈依个万紫千红嘅世界，自然唔会缺少万人迷，美少女，以及歌王歌后依一类被捧为星级偶像嘅新秀，佢哋小小年纪，就被捧上天，被祟拜，被模仿，一举一动成为Fans嘅焦点，一颦一笑触动好多人嘅情感。依一种普通人无法得到嘅魔力，带嚟好大满足感，使人着迷，亦容易令人不知不觉失去自我！尽管如此，每一个年代仍然有好多年青人梦想自己成为偶像，一尝滋味！

七十至九十年代系香港人嘅奋斗期，亦可算系娱乐圈光辉灿烂时代。依几个年代，我哋唔单止有歌王歌后，仲有歌神添，跟住又有天王天后，认真热闹。依班偶像嘅才艺受到肯定，佢哋生活动向亦都成为八卦新闻主流。睇佢哋表演，有电视电影演唱会，听佢哋唱歌有电台唱片，仲有CD；至于佢哋嘅绯闻情史又或者系事业发展，就系报纸杂志嘅主线古仔。总之，佢哋已经融入咗每个人生活，好似你邻居，好似你朋友，甚至亲人。

歌星偶像影响力大，公众对佢哋期望大，品格要求自然比一般人高，因为佢哋举止言行，有好多人模仿，品德高尚，佢哋嘅Fans就唔会低俗。所以，佢哋被现实环境训练到自我检点能力相当高，唔敢行差踏错，因为偶一不慎，稍有纵情出轨就可能堕入深渊，永不超生！咁多年嚟，活生生例子屡见不鲜，记忆犹新嘅电视姐仔背男友偷搭有妻之夫男歌手，最终人间蒸发，前途茫茫！你可能会话，男欢女爱之事本是平常，唔应该咁大剂噃！但系，现实就系咁苛刻，有名气就系要受到严厉监督，标准比普通人系高啲㗎喇，鬼叫你你哋出名咩！

嗱，新鲜滚热辣又有一剂，大家都记得啦，早排黑暴横行，搞到天下大乱。黑喼帽黑衫黑裤，加埋个黑口罩，已经被认定系黑暴嘅制服啦，普通人都会避忌下。徧徧就有个近年被封为全民新星嘅哥仔，喺一个好敏感嘅“反纳粹游行”嘅日子，戴黑帽黑口罩，著住黑衫黑裤，话去排舞出现喺铜锣湾。𠮶日咁敏感，警方梗系严阵以待啦，见到个咁嘅打扮人士，唔截停搜查就奇啦！结果，依一个唔止系少男少女拥戴嘅新偶像，仲要系连师奶阿叔都钟意嘅靓哥仔，要当街俾人搜身，查身份证，俾Fans影埋相拍埋片添，真系该烩嘞！依个哥仔又唱得又跳得，加上后生俊俏，真系前途无量㗎，如果因为咁而啧湿咗个名，就唔值得啦！话时话，依个哥哥仔得廿岁，经验唔够，敏感度不足，但作为佢嘅监制，应该识谂㗎，点不知，当有记者问佢，会唔会叮嘱依个哥哥仔以后唔好咁嘅装扮出街？你估佢点答？佢话：佢平时都系咁出街㗎㖞！喂，大佬呀，成语有话：瓜田李下啦，细佬仔唔识嘢唔怪佢，作为佢嘅监制，大人嚟啦，识得分寸啦，咁唔容易捧到个偶像出嚟，系咪好应该珍惜佢羽毛，好好教育佢呢？希望监制系表里不一，为咗要“型”先至咁答啦，如果唔系，呀哥哥仔咁様落去，再赖嘢就未必好似今次咁好彩喇！

资深媒体人

玮公子