政是政非 ﹕血浓于水点会淡过杯滚水

香港人向来善良，好有爱心，正因为咁，所以得天独厚，天灾人祸相对较少。依几日，睇见河南水灾嘅惨况，真系好震惊！灾民无助同埋𠮶种惶恐嘅眼神，睇见都难过！内地同胞同我哋血浓于水，香港人又应该系时候伸出援手喇！

河南郑州暴雨成灾，长江泛滥引发嘅千吨洪水住来势汹汹，冲破堤坝涌入城市，淹没街道楼房，摧毁地下铁路，破坏所有公用设施。城市瘫痪，停水停电，数以千计市民来不及走避，有死伤待救，有被困危楼，一时之间，繁华闹市顿成泽土，损失巨大。

大自然嘅力量原来真系好可怕，人岂能胜天？任你耗资百亿，如何精密设计泄水排洪，谁知天发雷霆，竟然不堪一击！郑州嘅惨况，真系俾世人一次好好反省，城市发展固然重要，但系千祈唔好忽略大自然嘅破坏力！另一方面，又再证明互联网威力无穷，洪水涌入淹灭城市嘅景象；数百人被困地下铁路嘅惨况；武警奋不顾身救人嘅英勇，我哋香港同胞好快就喺互联网睇到，歴歴在目感同身受！边个仲会乱噏，话内地封锁消息，隐报灾情呢？今时今日，依种抹黑，不攻自破喇！

喺以往，毗邻地方发生天灾，港人出钱出力，积极募捐赈灾，爆棚爱心遍达各地，令人感动。最令人印象深刻嘅条90年代内地华东水灾，香港喺短短10日，就筹咗6.47多亿港元赈灾，认真厉害。2008年，汶川大地震，死伤枕藉，香港人再展爱心，筹款赈灾加上协助重建，数额高达百亿元。近几年，香港社会政治化，一种莫名其妙嘅偏激思维令到好多人淹没本性，迷失方向，血浓于水变咗淡过滚水！

不过，香港人始终善良，当大家见到同胞受苦嘅画面，除非佢坏咗个脑，又或者泯灭人性啫，否则，又点会唔出手相助呢？嗱，大家睇吓，今日已经有名人明星率先捐款赈灾嘞，谢霆锋捐100万，容祖儿又立即向应，政界女强人叶刘不甘后人，又捐出50万。依种充满爱嘅正能量立即产生抛砖引玉嘅作用，据闻已经有商会社团纷纷起动募捐赈灾。系呀，香港精神又返番嚟喇！其实大部分香港人都系明是非，有良知嘅！你，我，他，而家最应该做嘅，系有钱出钱，有力出力，捐钱嘅嘢，唔理多少，就算系一蚊都好，都系心意！河南郑州同胞水深火热之中，我哋唔好犹豫喇！

资深媒体人

玮公子