政是政非 ﹕ 「寒戰」疫症，人間送暖

香港當前大事只有一件，就係全民上下一心合力抗疫，勢要將疫魔Omicron 打敗，儘快回復正常生活。的而且確，依幾年嘅香港人，真係未好過；佔中，黑暴，然後係疫症！五波疫情，香港只能應付到較輕微嘅第一、二同埋第四波。嚴重嘅第三波同埋今次嘅第五波，好在有強大後盾嘅祖國撐住，如果唔係，香港一早就唔掂！

依個第五波Omicron ，早就知佢傳播力強勁，估唔到佢可以搞到一日成萬人染疫；香港一直自以為好勁嘅醫療系統話冧就冧，醫院爆棚，病床放到出戶外，最攞命係碰啱寒流襲港，更可憐係中咗病毒嘅病人未及治理，就要抵受刺骨寒風，簡直係雙重受難，苦不堪言！正所謂「寒天飲雪水 點滴在心頭」，呢一敞，香港應該可以話係自日本仔侵佔3年零8個月以嚟，最折墮嘅一次咯！

香港依幾日，係入冬以嚟最凍嘅天氣，加埋落雨就係濕加凍，都咪話唔惡頂！好彩，喺習大大一聲令下，加埋中記駱主任嘅呼籲，香港有實力嘅商賈二話不說，紛紛出錢出力。有人就率先捐出一百支戶外暖燈，火速就送去俾醫院戶外病人，排隊等候檢測嘅市民，同埋圍封檢測區域工作人員，等佢哋唔駛捱更抵冷，「寒戰」疫症，真係貼心！嗱，咪以為依批保暖燈，佢送咗出去就算呀，戶外暖燈需要按時補充燃料嘅，所以需要動用大批人手，喺唔同時間去全港九幾十個戶外暖燈所在點補充燃料，保證能夠感「雪中送暖」！

嗱，Omicron 依場疫戰雖然難打，好在祖國嘅專家同埋支援隊依幾日已經抵達，方艙醫院亦正在興建中，香港有咁強大後盾撐住，唔少好似上面嗰位有心人咁嘅商賈亦紛紛用唔同方式提供支援，我哋好有信心，只要香港市民同政府一條心，依場仗一定會打贏！

資深媒體人 瑋公子