《香港灵宵艺传》促进和保留香港粤剧的特色与优点 创会董事谢晓莹：“守正之余就是创新”

香港灵宵艺传早前举行了艺传启动礼，除了对一众会董与顾问进行委任外，也举行艺传较早前和香港电台联合主办的青少年粤剧传承计划：首届青年粤剧传播视频比赛“吾乃XOL”颁奖礼，嘉许一众年轻参加者。

香港灵宵艺传成立宗旨是为了促进和保留香港粤剧的特色与优点，并按照传统订立规范。艺术顾问团成员阮兆辉表示：“讲到粤剧我哋需要好多人参与，梗系一代传一代，我希望小朋友又好，中朋友又好，可以首先去尝试粤剧，就当玩都可以玩一阵先，如果你玩到有兴趣就继续练，继续加入，就算你唔做戏，去做研究粤剧都得㗎，而且学粤剧可以锻炼身体，唱嘅时候就练呼吸，仲有一样嘢就系粤剧讲《忠、孝、哲、义》，所以小朋友学完粤剧都应该系乖啲嘅。”创会主席高润鸿说：“我哋灵宵艺传都有一啲好新嘅粤剧推广，好似我哋举行咗一个叫做《吾乃XOL》嘅网上短视频比赛，对象系一班高小或者初中嘅青少年，希望佢哋可以透过比赛接触粤剧，喺保留传统精粹嘅前提下，加入佢哋年青人嘅思维，TRAIL & ERROR，将戏曲重新包装，喺网上平台推广俾多啲唔同嘅人去认识香港粤剧，将戏曲推向社区，走向世界。”

创会董事谢晓莹说：“我系土生土长嘅香港人，我系粤剧演员，对于粤剧系别有情怀，我哋办香港灵宵艺传呢个慈善团体嘅初衷，就系希望可以为香港粤剧订立一个新嘅标准，等大家可以知道香港粤剧系灵活多变，之后就会一直梯队式咁传授落去，我哋系守正之余就系创新，会用新嘅方法就好似今次嘅《吾乃XOL》视频比赛。其实小朋友学粤剧好处都好多，好似啱啱讲嘅《吾乃XOL》视频比赛，参赛嘅学生喺学剪辑视频之前就上咗五课，呢五课除咗有一课系视频课，其余全部都系艺术课，有《唱、唸、做、打》，剧本研定，音乐同伴奏等等，我哋喺学习期间订立咗一啲科班式或者戏班式嘅规矩比佢哋，要佢哋上堂前讲早晨，落堂𠮶阵同我哋讲辛苦晒，呢啲都系训练佢哋嘅礼仪，原来小朋友喺督促底下系可以做到好好，上课都会更加认真。”董事会成员兼传承第一梯队导师李龙则表示：“其实小朋友学粤剧基本上好多嘢都唔识，像最初阶段嘅《唱、做、唸、打》都要去练，好似佢哋《唱》之余可以睇埋谱，知多啲音乐同旋律就会更好，系《做》𠮶方面，就会有导师帮佢哋排练，我哋亦会将演出同舞台嘅经验慢慢灌输俾佢哋。佢哋唱粤曲同学粤剧可以认识更多广东话同中国文字，虽然喺唱词入边唔系句句引经据典，但有一啲会系成语，谚语或者歇后语，亦都可以知道更多历史人物，对大家嘅中文根底会有更好嘅帮助。”

高润鸿最后补充：“香港灵宵艺传以《艺传》命名，顾名思义 – 以《艺》术《传》承为重中之重。作为香港非物质文化遗产的一个重要项目，港式粤剧可持续发展是一项极具意义且充满挑战的使命。灵宵艺传很有信心在大湾区共融的情况下，保留、突显香港粤剧的独特个性，在各地文化共融中发光发亮。”