政是政非 ﹕咪揾外人搞屋企

美國總統約翰甘迺迪有一句名言「不要問國家可以為你做什麼，你應該問自己可以為國家做什麼？」，每次諗起依句話，我就毛管戙，唔好講到為國家咁偉大嘞，問下自己，究竟有冇對依個社會有貢獻呢?數數下，都好似冇乜喎！當堂個人謝晒，好慚愧咁自己安慰下自己，我雖然冇貢獻，但至少我冇破壞個社會吖，都算係咁啦！

我又諗，如果人人都肯揾個時間，停一停，反思一下，依個社會可能會太平好多喎。其實，以前個社會真係咁㗎，樣樣嘢都可以用和平方法解決㗎，你哋要政治有民主，就逐步逐步慢慢爭取啦，夾硬要跟你哋嘅進度一步登天，而家覺得唔順意，郁下就抗爭，動不動就毀壞公物，燒人舖頭。仲要四圍揾幫手，公然要求外國政府制裁香港，還覺得理直氣壯，以為自己好英咁！大佬呀，個社會冇欠你哋㗎，公然揾外國搞自已個屋企，喺美國，咁様做已經係叛國罪啦！

所以，港版國安法警惕一下政治上腦嘅人，唔好以為揾外國撐腰就為所欲為！前幾日有個後生俾拉之後保釋出嚟，仲話唔知點解拉佢，又話政治打壓，唔知自己已經過哂界！其實，外國政府個個都雙重標準，新西蘭總理就係人版啦，香港由於疫症押後立法會選舉，佢就立即嘈嘈閉，發聲明批評港府！唔知係咪現眼報，隔咗唔夠一個禮拜，新西蘭有4個新確診個案，佢即刻話佢地個大選考慮延期！你話啦，講一套做一套，你哋信佢？死得啦！

資深媒體人

瑋公子