政是政非 ﹕咪揾外人搞屋企

美国总统约翰甘迺迪有一句名言“不要问国家可以为你做什么，你应该问自己可以为国家做什么？”，每次谂起依句话，我就毛管戙，唔好讲到为国家咁伟大嘞，问下自己，究竟有冇对依个社会有贡献呢?数数下，都好似冇乜㖞！当堂个人谢晒，好惭愧咁自己安慰下自己，我虽然冇贡献，但至少我冇破坏个社会吖，都算系咁啦！

我又谂，如果人人都肯揾个时间，停一停，反思一下，依个社会可能会太平好多㖞。其实，以前个社会真系咁㗎，样样嘢都可以用和平方法解决㗎，你哋要政治有民主，就逐步逐步慢慢争取啦，夹硬要跟你哋嘅进度一步登天，而家觉得唔顺意，郁下就抗争，动不动就毁坏公物，烧人舖头。仲要四围揾帮手，公然要求外国政府制裁香港，还觉得理直气壮，以为自己好英咁！大佬呀，个社会冇欠你哋㗎，公然揾外国搞自已个屋企，喺美国，咁様做已经系叛国罪啦！

所以，港版国安法警惕一下政治上脑嘅人，唔好以为揾外国撑腰就为所欲为！前几日有个后生俾拉之后保释出嚟，仲话唔知点解拉佢，又话政治打压，唔知自己已经过哂界！其实，外国政府个个都双重标准，新西兰总理就系人版啦，香港由于疫症押后立法会选举，佢就立即嘈嘈闭，发声明批评港府！唔知系咪现眼报，隔咗唔够一个礼拜，新西兰有4个新确诊个案，佢即刻话佢地个大选考虑延期！你话啦，讲一套做一套，你哋信佢？死得啦！

资深媒体人

玮公子