政是政非 ﹕專家原來亂噏係秘笈

前輩教誨：如果對一件事有偏見，千萬唔好扮中肯俾意見，特別係你嘅身分地位舉輕重嘅時候，你輕輕講一句可能影響好大，分分鐘會累死人。所以，要有口德，一係唔出聲，如果講得出就要負責任，咪當生草藥，噏得就噏！

之不過，今時今日啲所謂有識之士，孭住個專家名銜，利用人哋對佢身份嘅信任，就係鍾意亂咁噏！早前鼓吹全面禁堂食，搞到怨聲載道，就扮同情懶憐憫咁認衰。之前政府因資源及人力不足，做不到全民檢測，佢就話政府一定要增加檢測，而家政府得到阿爺撐住，可以全民檢測，佢又話全民測試成効低，自己唔會去參加喎！大佬呀，神又係你，鬼又係你！亂噏當秘笈，龍門任佢搬，真係信佢一成，雙目失明！

依一次全民檢測，係自願性質，目的係要揾出隱性傳播者，及早攔截避免四圍播毒，係一個有效隔絶病毒傳播嘅措施，只要大家配合，個個去做測試，有事嘅快啲去醫，如果知冇事咯，就心安理得啦，有乜唔好呢？依個新型肺炎，隱藏性好高㗎，冇病徵同常人一樣，唔驗過又點知自己係咪真係冇事吖！嗰個專家，自己仲係醫生添，冇理由唔知依個道理吖，佢唔測試又憑乜嘢話自己唔係隱性傳播者呀，原來佢行醫係憑感覺㗎？都幾得人驚噃！

今次全民測試，阿爺都算唔話得喇，咁多人力同資源協助，本來就係一件好事，只可惜依家唔少人政治壞腦，係唔係就用陰謀論去醜化件事；啲向來政治徧見嘅專家呀、名嘴呀又夾硬將件事扭橫折曲亂咁噏，搞到大家無所適從！其實，咁又何必呢？點解樣樣嘢都咁負能量呀，何不凡事正面啲諗，先放低成見，齊心合力打贏依場疫戰再算啦！

資深媒體人

瑋公子