政是政非 ﹕专家原来乱噏系秘笈

前辈教诲：如果对一件事有偏见，千万唔好扮中肯俾意见，特别系你嘅身分地位举轻重嘅时候，你轻轻讲一句可能影响好大，分分钟会累死人。所以，要有口德，一系唔出声，如果讲得出就要负责任，咪当生草药，噏得就噏！

之不过，今时今日啲所谓有识之士，孭住个专家名衔，利用人哋对佢身份嘅信任，就系钟意乱咁噏！早前鼓吹全面禁堂食，搞到怨声载道，就扮同情懒怜悯咁认衰。之前政府因资源及人力不足，做不到全民检测，佢就话政府一定要增加检测，而家政府得到阿爷撑住，可以全民检测，佢又话全民测试成効低，自己唔会去参加㖞！大佬呀，神又系你，鬼又系你！乱噏当秘笈，龙门任佢搬，真系信佢一成，双目失明！

依一次全民检测，系自愿性质，目的系要揾出隐性传播者，及早拦截避免四围播毒，系一个有效隔绝病毒传播嘅措施，只要大家配合，个个去做测试，有事嘅快啲去医，如果知冇事咯，就心安理得啦，有乜唔好呢？依个新型肺炎，隐藏性好高㗎，冇病征同常人一样，唔验过又点知自己系咪真系冇事吖！𠮶个专家，自己仲系医生添，冇理由唔知依个道理吖，佢唔测试又凭乜嘢话自己唔系隐性传播者呀，原来佢行医系凭感觉㗎？都几得人惊噃！

今次全民测试，阿爷都算唔话得喇，咁多人力同资源协助，本来就系一件好事，只可惜依家唔少人政治坏脑，系唔系就用阴谋论去丑化件事；啲向来政治徧见嘅专家呀、名嘴呀又夹硬将件事扭横折曲乱咁噏，搞到大家无所适从！其实，咁又何必呢？点解样样嘢都咁负能量呀，何不凡事正面啲谂，先放低成见，齐心合力打赢依场疫战再算啦！

资深媒体人

玮公子