政是政非 ﹕五斗米豈同300萬

古有陶淵明：不為五斗米折腰。風高亮節，流芳百世。不過，今時今日依種骨氣，用把口講吓，呃下人就得，真係要做？儍仔，唔駛揾食咩！錢喎，點會嫌多㗎！

係囉，又係講緊嗰班扭盡六壬，睇吓點樣先至可以留任一年又可以自圓其説嘅泛民議員囉。依排佢哋又話公投，又搞民調，為咗萬無一失，夾埋班所謂嘅學者，喺民調上面又加兩條門檻保佢哋入閘，利之所在，原來乜鬼道德呀、人格呀、甚至尊嚴都可以唔要！真係好鬼肉酸！

反而佩服葉太，佢鬧人的確有point，而且有哂數據。佢同泛民計咗條數出嚟，話泛民留又難，唔留又難喎。不過，我睇咗條數，泛民嘅意向，就一目了然啦！葉太條數係咁計嘅：每位立法會議員每月薪津101,000元（雙料議員會扣三分一），一年即係1,212,000元；任滿酬金是總薪津的15%，原先四年任期的任滿酬金是727,200元，延任一年的任滿酬金則有181,800元；另外，仲加醫療津貼每年35,180元、酬酢及交通開支每年221,310元，及實報實銷營運開支每年約2,770,970元。
佢又話，而家「決定」議員延任一年，任滿酬金係先結算首四年？還是待整個第六屆任滿後才一次過結算？就必需留待立法會行管會決定。不過，既然第六屆延任一年，佢哋認為待任期屆滿後才一次過結算較為合理。

嗱嗱嗱，個point就係依度嘞，如果真係咁計算，唔留任嘅議員就會失去共909,000元任滿酬金，額外一年的薪津1,212,000元、及醫療酬酢營運開支津貼共3,027,460元。喂，大佬，300幾萬喎，唔係講笑嘛，今時今日無驚無險揾300幾萬，咁易咩！陶淵明都係五斗米啫，而家幾百萬又點忍得手呀？風高亮節依家嘢，遲啲啱時機，先再攞出嚟呃下人啦，而家就側側膊袋咗先囉噃！

資深媒體人

瑋公子