政是政非 ﹕反對派延任一年就唔該咪玩嘢

依個世界，有時好多事情都可以心領神會，唔駛樣樣嘢都要畫公仔畫出腸嘅。正常謂無聲勝有聲嘛！嗱，睇吓批反對派立法會議員，上星期唔係就乖乖地齊齊去開立法會內會囉，乜鬼總辭呀，公投呀，民調呀！唉，忘記佢啦，大家側側膊，唔多覺，係咁就過骨囉！嚟緊一年，齊齊延任，睇怕都冇乜懸念喇！

問心講，過去嗰屆立法會，反對派議員玩嘢多個做嘢，尤其被個社會運動牽住鼻子走，行為意識不自覺咁越玩越激，冇啦啦變咗攬炒派！公文袋就係例子啦，本來好地地係有學識修養之士，無端端諗埋一邊愈來愈徧激，專搞對抗不務正業，終於玩到過哂火位，想煞車扭呔，都嚟唔切！因緣際會，現屆立會議員延任至少1年，對班反對派議員嚟講，真係菩薩顯靈喇，除咗一年又多幾舊水落袋，仲俾咗個好好嘅時機佢哋重回正軌，做翻多啲好事啦，咪玩嘢喇！

嗱，喺疫情咁唔穩定之下，社區裏面有冇隱藏傳播者真係好難揾㗎，全民大測試係一個最可靠而快捷揾到隱藏傳播者的方法之一，而政府又動用咁大人力物力，阿爺提供資源，派大隊人馬落嚟撐場，可謂用心良苦，雖然大測試嘅實際効用有幾大，仍然好多爭議，但做咗點都好過唔做啩？既然錢都駛咗咯，驗下亦無妨吖，至少自已可以安心啦！但真係吹脹，有幾個反對派立法會議員又徧徧玩嘢嘞，扮哂有型唱反調，話評估過接受測試作用唔大，而且驗完都有可能會被感染啦，所以索性唔去驗咁話喎！

喂，大佬呀，你哋咪害人啦.。攞啲咁嘅歪理呃人，邊有話擔保你唔會感染㗎，如果咁堅，全世界都嚟揾香港幫手啦！乜做咗測試就可以保證唔會被感染咩？咁你做完癌細胞測試，醫生話你冇事，又可唔可以保證你唔再生癌呀？簡直廢話連篇！你哋唔測試係你哋嘅事，咪慫恿人哋唔參加嘛！如果有人真係隱性傳播者，聽咗你講唔去測試，喺個社區繼續傳播，你係害死好多人㗎！積吓陰德啦，求神拜佛你哋唔好中招呀，如果唔係，你又唔去騐，冇人知，係咁喺個社區播毒，真係多得你唔少呀！呀尊貴議員，凡事都要兩面睇，道理唔會永遠喺你嗰邊㗎，醒啲啦！

資深媒體人

瑋公子