政是政非﹕ 冇料大狀憑乜閙資深法官

今時今日嘅香港，充斥住嘅都係未夠班唯我獨尊嘅自大狂。個個信口開河，不分尊卑，又冇廉恥，將成個香港嘅水準都拉低哂！係呀，唔係就係講緊早排好似縮頭烏龜咁潛咗水，而家見冇乜事又蒲頭出嚟廢噏，以為攞住個大狀資格就好巴閉嗰個垃圾議員囉，喂，大佬，佢唔係好鍾意學英國佬咩，點解人哋法律界傳統落嚟嗰套論資排輩都唔尊重下呀，佢有乜資格批評輩份高佢十段嘅前輩呀？咁搞法，英國佬都唔幫佢啦！

連一場漂亮官司都冇打過，喺大狀榜上企大後排嘅冇料之輩，居然大放厥詞批評資歴深厚，喺法律界備受敬重嘅終審法院前常任法官！查實喺法律界裏面，佢論輩份、論資歷，拍馬都追唔上嗰位法官；至於講法律常識同埋經驗就唔好比嘞（真係唔知佢究竟仲識唔識打官司），就講江湖地位嘞，佢就已經冇得揮啦！香港法律界自英國佬年代起，向來有規有矩，推祟尊師重道，就算意見不合，都會扮吓嘢尊重對方意見，特別對前輩，總會退讓三分。估唔到嚟到依個年代，一班後起之「秀」，英國佬嘅虛有其表，例如煲呔袋巾、三件頭就擺哂上身學到足，但係啲內涵呀氣質呢，就統統學唔到！喂，班友仔咁鬼祟拜英國佬，點解佢哋對住仇家仲可以笑笑口，握手兼拍膊頭嘅虛偽技倆，又徧徧學唔到呢？而家嗰位法官前輩喺度發表佢個人意見啫，又冇得罪佢，更加唔算得上仇家啦，喂，如果佢認為法官嘅意見唔啱聽，就用更好法律意見駁佢囉！佢唔係好專業，好叻嘅咩？應該好多理據㗎，點解唔提出呢？而家發爛渣閙人，仲近乎人身攻擊添，過火咗啦，失禮死人！

其實，法律界新「秀」嘅道德品行真係大不如前！好似另一個同係法律界嘅議員，佢做大狀之前跟嘅師父因政治原則辭去議員職務，全力支持佢競選補任，卒之成功咗啦，誰不知貴為議員之後，因同個師父政見唔同，就反面唔認人，對師父當日教導提攜之恩拋諸腦後，形同陌路！

唉，我哋細佬哥時，小學又好，中學又好，謝師宴上送俾老師嘅牌匾，好鍾意有依一句：「一日為師，終身為父」，不過，到咗今時今日，依句說話已經不再合用！莫說話老師前輩，就算係年紀大啲，都俾人鬧「廢老」！最可悲係而家好似文革咁，好多唔想俾人閙「廢老」嘅人就急不及待向啲後生仔示好，幫手去鬧自己同齡或比自己年紀老嘅人「廢老」！老，今日原來係一個罪，何其荒謬！不過，提一提大家，時間過得好快㗎，冇幾耐你哋都會變廢老，好快受罪喇！

資深媒體人

瑋公子