政是政非 ﹕司法獨立抑或獨大呢？

政圈最近熱烘烘嘅話題，係三權分立。講來講去就係好理想咁要香港可以做到行政、司法、立法互相制衡。之不過，理想還理想，實際係點？大家心裡都明白，我哋香港從來就未試過有三權分立依回事！英國佬殖民地時候，港督大哂，行政主導嘅政府係話事，立法局全部都係佢委任嘅人，司法界就更加唔駛講啦，全部鬼佬把持，最高終審權喺英國。正一係班主、教練、球員、球證都係佢嘅人，場波佢打哂。

回歸前，肥彭無端端「皇恩浩蕩」，忽然話要幫香港建立一個佢定標準嘅制度，話要行三權分立喎。喂，大佬呀，回歸之後仲係你話事咩？你話改就改咩？而且你自己都唔係行嗰套，臨走就夾硬要人行一套自己從未行過，行唔行得通都唔知嘅制度，有冇搞錯呀！

我哋啲升斗市民，其實唔係好理你行邊套，老實講，回歸之後，好多人都搞唔清楚特區政府行緊邊套，總之社會安定，人人揾到食就得囉！反正，你幾多個權都好，對小市民嚟講，都係遙不可及㗎啦！特別係司法界，本來就係獨立王國，啲法官向來高高在上，只有佢講，唔會聽你講！佢哋做嘢，無論啱定錯，都係自己監察自己，閂埋門四四六六拆掂㗎啦！警察自己人查自己就惹嚟諸多批評，有冇聽過話查法官吖？咁多年嚟就算有，都係鳳毛麟角啦！

嗱，最近發生咗兩單嘢，就係最好證明嘞！一單係出哂名對黑暴富有同情心嘅裁判官，可能真係「放生」得太令人關注喇，司法機關都要做啲嘢，暫時請佢休息下唔好審案，調去處理內部做「排期官」啦，名義上係平調，但原來好過升職，因為咁調一調，每月收入多成五餅嘢，嘩！筍到無倫！係囉，你哋嘈嘈閉有乜用，明益佢，吹脹咩！喂，另一單仲離譜，由最資深嘅法官召集所有裁判官，話就話係「講座」，但唔准唔參加，席上語帶相關，叫啲官「想清楚先好定罪」；「唔好隨便批評被告同埋鬧辯方律師」，擺到明就係判刑指引同埋警告。咁，你話嗰班裁判官識時務嘅，會點做呢？大家明啦！

所以話，一權獨大就有，三權互相制衡監察？睇嚟，講吓就得，要做咩，邊個插到手入去依個咁獨立嘅界別呀，咪講笑喇！仲有呀，提下你哋呀，咪隨便批評法官呀，唔覺意犯咗條藐視法庭罪，監都有得坐㗎！

資深媒體人

瑋公子