政是政非 ﹕司法独立抑或独大呢？

政圈最近热烘烘嘅话题，系三权分立。讲来讲去就系好理想咁要香港可以做到行政、司法、立法互相制衡。之不过，理想还理想，实际系点？大家心里都明白，我哋香港从来就未试过有三权分立依回事！英国佬殖民地时候，港督大哂，行政主导嘅政府系话事，立法局全部都系佢委任嘅人，司法界就更加唔驶讲啦，全部鬼佬把持，最高终审权喺英国。正一系班主、教练、球员、球证都系佢嘅人，场波佢打哂。

回归前，肥彭无端端“皇恩浩荡”，忽然话要帮香港建立一个佢定标准嘅制度，话要行三权分立㖞。喂，大佬呀，回归之后仲系你话事咩？你话改就改咩？而且你自己都唔系行𠮶套，临走就夹硬要人行一套自己从未行过，行唔行得通都唔知嘅制度，有冇搞错呀！

我哋啲升斗市民，其实唔系好理你行边套，老实讲，回归之后，好多人都搞唔清楚特区政府行紧边套，总之社会安定，人人揾到食就得囉！反正，你几多个权都好，对小市民嚟讲，都系遥不可及㗎啦！特别系司法界，本来就系独立王国，啲法官向来高高在上，只有佢讲，唔会听你讲！佢哋做嘢，无论啱定错，都系自己监察自己，闩埋门四四六六拆掂㗎啦！警察自己人查自己就惹嚟诸多批评，有冇听过话查法官吖？咁多年嚟就算有，都系凤毛麟角啦！

嗱，最近发生咗两单嘢，就系最好证明嘞！一单系出哂名对黑暴富有同情心嘅裁判官，可能真系“放生”得太令人关注喇，司法机关都要做啲嘢，暂时请佢休息下唔好审案，调去处理内部做“排期官”啦，名义上系平调，但原来好过升职，因为咁调一调，每月收入多成五饼嘢，哗！笋到无伦！系囉，你哋嘈嘈闭有乜用，明益佢，吹胀咩！喂，另一单仲离谱，由最资深嘅法官召集所有裁判官，话就话系“讲座”，但唔准唔参加，席上语带相关，叫啲官“想清楚先好定罪”；“唔好随便批评被告同埋闹辩方律师”，摆到明就系判刑指引同埋警告。咁，你话𠮶班裁判官识时务嘅，会点做呢？大家明啦！

所以话，一权独大就有，三权互相制衡监察？睇嚟，讲吓就得，要做咩，边个插到手入去依个咁独立嘅界别呀，咪讲笑喇！仲有呀，提下你哋呀，咪随便批评法官呀，唔觉意犯咗条藐视法庭罪，监都有得坐㗎！

资深媒体人

玮公子