政是政非 ﹕政府唔派錢 消費券有得諗

政黨最近好忙碌，因為要為特首10月嗰份施政報告提建議。政圈有個良性競爭嘅常規，就係政黨鬥快見特首，然後提出水蛇春咁長嘅建議書，同特首短短見面一個鐘之後，就出嚟見吓記者，講吓提咗啲乜，向公衆交代。為咗搏取市民掌聲，建議嘅內容通常都係民生居多，好似今年咁，要求特首再派錢紓民困，就成為多個政黨嘅主題，亦係媒體報道重點。

不過，建議歸建議，特首採納有幾多呢？真係有如猜謎，冇人有把握！所以等特首10月中宣布施政報告嗰時，就會好似派彩一樣，政黨爭相邀功，睇吓貼中幾多，大燒炮仗嘞！之但係今年可能情況唔同喎，一）疫情雖然好似逐漸穩定，但實際上變數好大，任何大動作兼改革性嘅施政措施都唔容易執行。二）政府抗疫防疫，保就業救企業又濟失業，已經用咗好多錢，再要特首派錢難度極高，一來據聞特首能動用嘅錢已經唔係好多，二來財爺成日「量入為出」掛嘴邊，佢都要顧住自已個財政預算案㗎，再要佢諗計錢派街坊，梗係難上加難啦！所以，政黨要搏民心迫政府派錢嘅如意算盤，打唔響喇！反而台灣嗰招「消費券」或者有得諗。

而家全球爆疫，個個地方都封哂關，個市死到寂，唯一辦法係倚賴本地人發展本地經濟，亦即係俗語所講嘅：塘水滾塘魚，刺激本地消費，搞旺個市。台灣推行嘅消費券叫做三倍券，民眾可向政府用1000蚊買3000蚊消費券，規定喺特定限期內喺市面消費，多用多賺。當然，如果你唔想消費或者冇多餘嘅錢消費，咁就唔好去買囉，至少咁樣做，可以刺激到好多好想消費又負擔得起嘅人消費慾。香港其實可以照版煮碗照做，再拉埋班大業主落水，承擔些少責任，要求佢哋減啲租，咁商戶負擔冇咁重，消費者又有著數，對內銷經濟會發揮好大刺激作用㗎！

嗱，講開又講，真係唔好睇少內銷呀，今年內地提出嘅「國內國際雙循環」經濟戰略，就係用鉅大嘅內銷市場為主打，接軋國際形成一個大循環嘅格局。聽起嚟，好似好深奧，簡單嚟講，就係改變以往倚靠外銷國際為主嘅經濟策略，轉以內銷為主。因為，依個係內地獨有優勢，單係人口都14億啦，而喺2019年，內地嘅內銷總額高達41萬億元人民幣，係咪嚇死人呢？好嘞，講番轉頭，香港雖然內銷市場冇內地大，但事急馬行田，點都要做啦，何況消費券依個Idea本少利大，點都好過派錢啦！

資深媒體人

瑋公子