政是政非 ﹕政府唔派钱 消费券有得谂

政党最近好忙碌，因为要为特首10月𠮶份施政报告提建议。政圈有个良性竞争嘅常规，就系政党斗快见特首，然后提出水蛇春咁长嘅建议书，同特首短短见面一个钟之后，就出嚟见吓记者，讲吓提咗啲乜，向公众交代。为咗搏取市民掌声，建议嘅内容通常都系民生居多，好似今年咁，要求特首再派钱纾民困，就成为多个政党嘅主题，亦系媒体报道重点。

不过，建议归建议，特首采纳有几多呢？真系有如猜谜，冇人有把握！所以等特首10月中宣布施政报告𠮶时，就会好似派彩一样，政党争相邀功，睇吓贴中几多，大烧炮仗嘞！之但系今年可能情况唔同㖞，一）疫情虽然好似逐渐稳定，但实际上变量好大，任何大动作兼改革性嘅施政措施都唔容易执行。二）政府抗疫防疫，保就业救企业又济失业，已经用咗好多钱，再要特首派钱难度极高，一来据闻特首能动用嘅钱已经唔系好多，二来财爷成日“量入为出”挂嘴边，佢都要顾住自已个财政预算案㗎，再要佢谂计钱派街坊，梗系难上加难啦！所以，政党要搏民心迫政府派钱嘅如意算盘，打唔响喇！反而台湾𠮶招“消费券”或者有得谂。

而家全球爆疫，个个地方都封哂关，个市死到寂，唯一办法系倚赖本地人发展本地经济，亦即系俗语所讲嘅：塘水滚塘鱼，刺激本地消费，搞旺个市。台湾推行嘅消费券叫做三倍券，民众可向政府用1000蚊买3000蚊消费券，规定喺特定限期内喺市面消费，多用多赚。当然，如果你唔想消费或者冇多余嘅钱消费，咁就唔好去买囉，至少咁样做，可以刺激到好多好想消费又负担得起嘅人消费欲。香港其实可以照版煮碗照做，再拉埋班大业主落水，承担些少责任，要求佢哋减啲租，咁商户负担冇咁重，消费者又有着数，对内销经济会发挥好大刺激作用㗎！

嗱，讲开又讲，真系唔好睇少内销呀，今年内地提出嘅“国内国际双循环”经济战略，就系用钜大嘅内销市场为主打，接轧国际形成一个大循环嘅格局。听起嚟，好似好深奥，简单嚟讲，就系改变以往倚靠外销国际为主嘅经济策略，转以内销为主。因为，依个系内地独有优势，单系人口都14亿啦，而喺2019年，内地嘅内销总额高达41万亿元人民币，系咪吓死人呢？好嘞，讲番转头，香港虽然内销市场冇内地大，但事急马行田，点都要做啦，何况消费券依个Idea本少利大，点都好过派钱啦！

资深媒体人

玮公子