政是政非 ﹕神仙难救12瞒徒

依个世界，只要你够大声，厚脸皮，又巧舌如簧，明明自己指鹿为马，但系就夹硬讲到系人哋指鹿为马，咁你就得架喇！而家啲人立场先行，最紧要你讲啲嘢啱佢听，理得合唔合逻辑唧，一味盲撑，吹咩！

系囉，就系讲紧𠮶12个偷渡去台湾，俗称12瞒徒嘅弃保疑犯囉，佢哋俾内地公安扣押之后，一班声称话系佢地家属嘅人，由阿朱议员同埋涂律师陪同见记者，投诉香港政府唔肯帮忙引渡佢哋返嚟。依个记者会认真搞鬼，十几个声称家属嘅人著到好似蒙面超人咁，几乎系男系女都睇唔清楚！大佬呀，而家你哋系要展示伟大嘅父母之爱，救你哋个仔呀，点解连真面目都唔敢见人呀？如果你哋坚信自己个仔冇犯法，驶乜咁闪缩呀？你哋蒙住块面，鬼知你系咪真系人哋老窦老母咩！

嗱，少女浮尸碧海，个老母攞埋身分证，验埋DNA都俾人质疑佢唔系真老母，用番同一个标准，依班人又冇出示身分证，又冇验DNA，仲蒙埋面添，好难唔令人质疑噃！仲有呀，近排发生嘅“钉书钉”事件同埋唔少“演员”喜欢喺唔同场合扮演下不同角色，依啲所谓受害者，究竟系真系假，真系搞到人好鬼迷惘！正所谓乌鸦唱歌仔，唔出声由自可，一出声吓亲人，其中一个所谓嘅家属，居然够胆死话自己个仔其实𠮶日出海，只不过系去钓鱼，唔系偷渡，而且证据确凿㗎，因为佢见个仔出门𠮶时拎住鱼杆同埋两桶水㗎！哈哈，冇雷公咁远拎住两桶水去钓鱼？练大只咩！又当你钓鱼系真嘞，咁你只船出咗边界钓鱼又有冇犯法呢？阿叔，你个仔有冇申请出境呀，有冇捕鱼证呀？如果冇，就系违法囉，咁朱议员同埋涂律师又点帮你呀？你咁着紧个仔，就除咗个面罩口罩，俾啲诚意见人啦！

到咗而家依个局面，12瞒徒俾内地刑事拘留在所难免喇，将来仲有可能面对更多控罪同埋刑责。其实，揾朱议员同涂律师出面去救，佢哋只能尽人事㗎咋，事关佢哋当日咁激烈反对逃犯条例，都冇谂过要喺内地引渡逃犯返嚟依回事。唔知系咪现眼报，咁快真系要引渡㖞，又未有其他方法，点搞呢？大佬呀，内地有内地嘅法律，唔理你系内地人抑或香港人，任何有法治嘅地方都唔容许任何人违反法律。涂律师话：“有法治国家似乎会将12人送香港依法处理”，咁想问吓涂律师：本港有位前高官早排无啦啦俾美国佬话佢行贿，拘禁之后，连家人都唔俾见，结果喺美国坐咗几年监。用番同一标准，咁美国唔将佢送返嚟香港依法处理，涂律师向来推祟嘅美国，系咪就冇法治呢？

睇嚟，12瞒徒依舖神仙难救，点都要完成咗内地嘅刑期先返得嚟㗎喇！

资深媒体人

玮公子