政是政非 ﹕健康碼未得 港深病歷互通未必唔得

政府剛剛宣布咗3.0防疫抗疫措施，又要駛200幾億嘞，究竟實際作用有幾大，真係唔知！而香港人近排最熱門嘅話題，就係健康碼究竟幾時先可以搞掂，幾時可以恢復港粵澳三地通關？聽聞，市民依一個期望並唔樂觀，因為內地同澳門嘅疫情目前都控制得好好，唔想隨便開放，搞亂個局。所以，除非香港可以維持一個月本地0感染，否則都幾難有健康碼！

唉，啱啱過去嗰個星期，本港嘅本地感染數字仲上吓落吓，好唔穩定！睇嚟有排都通唔到關。做生意嘅人、跨境工作或者讀書嘅朋友，唔好期望咁多喇，只好，suffer啦！講開又講，健康碼依個名詞，其實引起好多誤解。好多人以為有咗依個碼就好掂，可以去到公共場所冇人阻你，餐廳任你入，好似一個健康認證嘅通行證咁，但其實當局解釋咗N次咁多，就算香港日後有咗健康碼，只不過係方便大家港粵澳三地通關之用，其他乜差用都冇㗎！至於外國有一種可以配合手機裝置，用嚟認證接受過測試人士嘅「追蹤碼」呢，對唔住，香港暫時冇打算要做噃！所以大家唔好混淆呀！

嗱，喺未有健康碼之前，唔少滯留喺內地嘅香港人都只能得個等字，當中有唔少人數係老人家，據聞有成4萬咁多！內地生活指數低，佢哋以前喺內地住，返嚟香港醫病好平常，亦好方便。但而家咁嘅環境，唔少人已經誤咗覆診期，斷哂藥喇，其實好慘！特首林太特事特辦，計劃委托香港大學深圳醫院協助跟進依啲病者，而院長盧醫生亦好樂意幫忙，一口應承。問題係深圳醫院必須要有依啲病者嘅病歷先可以跟進。咁依家電子科技咁方便，只要病人自己同意，香港將病歴傳過去話都冇咁易。依個其實係一件好事，喺內地嗰幾萬個老人家，就唔駛咁頻撲啦！點不知好事又變咗壞事喇，公文袋嗰位醫生議員政治上腦又話反對喎，話咁樣做病人私隱就冇哂保障，又話法例規定，唔容許資料流出境外添！

喂，話明係病人私隱，即係屬於病人自己嘅嘢啦，咁病人如果自己同意將資料傳過去，又有乜問題呀？啲老人家冇症睇，冇藥食，水深火熱呀，你唔肯幫手都唔好阻頭阻勢吖！有所謂醫者父母心，點解香港就徧徧有啲人，為咗政治目的，寧願背叛專業道德，埋沒良心，唔理他人死活呢？唉，真係冇嘢好講！

資深媒體人

瑋公子