政是政非 ﹕健康码未得 港深病历互通未必唔得

政府刚刚宣布咗3.0防疫抗疫措施，又要驶200几亿嘞，究竟实际作用有几大，真系唔知！而香港人近排最热门嘅话题，就系健康码究竟几时先可以搞掂，几时可以恢复港粤澳三地通关？听闻，市民依一个期望并唔乐观，因为内地同澳门嘅疫情目前都控制得好好，唔想随便开放，搞乱个局。所以，除非香港可以维持一个月本地0感染，否则都几难有健康码！

唉，啱啱过去𠮶个星期，本港嘅本地感染数字仲上吓落吓，好唔稳定！睇嚟有排都通唔到关。做生意嘅人、跨境工作或者读书嘅朋友，唔好期望咁多喇，只好，suffer啦！讲开又讲，健康码依个名词，其实引起好多误解。好多人以为有咗依个码就好掂，可以去到公共场所冇人阻你，餐厅任你入，好似一个健康认证嘅通行证咁，但其实当局解释咗N次咁多，就算香港日后有咗健康码，只不过系方便大家港粤澳三地通关之用，其他乜差用都冇㗎！至于外国有一种可以配合手机装置，用嚟认证接受过测试人士嘅“追踪码”呢，对唔住，香港暂时冇打算要做噃！所以大家唔好混淆呀！

嗱，喺未有健康码之前，唔少滞留喺内地嘅香港人都只能得个等字，当中有唔少人数系老人家，据闻有成4万咁多！内地生活指数低，佢哋以前喺内地住，返嚟香港医病好平常，亦好方便。但而家咁嘅环境，唔少人已经误咗覆诊期，断哂药喇，其实好惨！特首林太特事特办，计划委托香港大学深圳医院协助跟进依啲病者，而院长卢医生亦好乐意帮忙，一口应承。问题系深圳医院必须要有依啲病者嘅病历先可以跟进。咁依家电子科技咁方便，只要病人自己同意，香港将病歴传过去话都冇咁易。依个其实系一件好事，喺内地𠮶几万个老人家，就唔驶咁频扑啦！点不知好事又变咗坏事喇，公文袋𠮶位医生议员政治上脑又话反对㖞，话咁样做病人私隐就冇哂保障，又话法例规定，唔容许资料流出境外添！

喂，话明系病人私隐，即系属于病人自己嘅嘢啦，咁病人如果自己同意将资料传过去，又有乜问题呀？啲老人家冇症睇，冇药食，水深火热呀，你唔肯帮手都唔好阻头阻势吖！有所谓医者父母心，点解香港就徧徧有啲人，为咗政治目的，宁愿背叛专业道德，埋没良心，唔理他人死活呢？唉，真系冇嘢好讲！

资深媒体人

玮公子