政是政非 ﹕人生苦短 要珍惜自己

上周末突然收到噩耗，平时fit到漏油，一个星期起码跑3日，每次跑10公里嘅多年老友阿卢，喺屋企睇睇下电视就走咗！唉，真系难以形容内心嘅不舍同悲痛！与阿卢相识不觉20多年喇，当年我喺美国返嚟，重投传媒圈，真系人生路不熟，好彩认识咗阿卢，佢真诚、热心、乐于助人，有佢扶一把，条路好行好多。我哋从此兄弟相称，互相帮忙，唔驶多讲一句。

人称卢Sir嘅阿卢，活跃传媒界，亦纵横于政商界，佢头脑灵活，充满干劲，而且计仔多多，富冒险精神。佢热衷于提携后辈，经常身先士卒，常挂咀边一句说话：“世上好多嘅冇可能，最后都成为事实，如果自己能够将冇可能嘅任务完成，就系顕现自己能力嘅最好证明！”冇错，就凭依句话，佢鼓励咗唔少新人，造就咗唔少人才，佢亦自己去实践，创造出一番成就。我认识嘅阿卢永不言倦，亦永不言休，生前仍满肚子计划，为公益，为传媒界嘅未来发展踌躇滿志。可惜，余愿末了，62岁正值壮年就猝然而去，令人惋叹，怀念！

一个活力充沛运动型嘅人突然之间就走了，令世人充满问号！阿卢系咁，台湾著名艺人小鬼亦几乎系相同遭遇！唔做运动就话会肥，肥就会多病啦，点知常做运动嘅人，原来亦一様难逃厄运！睇怕真系天意弄人喇！现代人生活紧张，工作以及精神压力之大实在难以估计，要抒缓依啲压力其实唔容易，因为佢积积埋埋究竟有几多，你自己根本唔知道。所以，做人一定先要睇得开，做事虽要认真但千祈唔好勉强，得就尽做，如果唔得就一于话之佢喇！

冇错，讲就易嘞，人人都好明白添，弊在做唔到呢！不过，有个老友教咗个方法，大家可以试吓，真系好work㗎。就系每逢遇上解决唔到嘅事，先放低佢，唔好鑚牛角尖死去谂点解决方法，揾吓其他嘅做，或者去揾娱乐，又或者好似我另一个老友咁：“努力去揾好嘢食”，潜意识就会释放好多压力。嗱，唔到你唔信㗎，𠮶件解决唔到嘅事无啦啦会搞掂，又或者你福至心灵突然就会想到点去解决。系呀，依个方法我试过好得㗎，而且万事万灵添！好多人都以为𠮶啲恶疾，例如癌症、心脏病可怕，其实，精神压力先至喺Final boss ，因为一切恶疾之源都系因压力影响情绪，导致体内失调所引发。所以，都系𠮶句啦，要活得自在，凡事睇开啲，人生苦短，及时行乐呀！

资深媒体人

玮公子