政是政非 ﹕係唔係都嘈餐飽 嘥氣

香港人真係好得意，係唔係都嘈餐飽！好似我先前提到，而家喺內地住嘅香港老人家，因為疫症返唔到嚟香港複診，所以特首就揾咗港大深圳醫院幫忙老人家覆診配藥，等佢哋唔使冇藥食，心慌慌唔知點算好！點知嗰啲坐喺立法會嘅代表醫療界嘅議員，不單止唔支持，仲諗埋啲九唔搭八嘅理由，話擔心病人啲病歷會洩漏，保障唔到個人私隱喎！你話係唔係吹脹吖，呢，依幾日又有一班自己話係傳媒界嘅代表出嚟嘈嘈閉，話好唔妥警方修改左條「警察通例」有關記者嘅定義，話怕影響新聞自由採訪自由喎！查實如果你係記者咁又使乜怕呢？佢哋究竟係唔係為嘈而嘈呢？

嗱，先講香港老人家喺內地睇病嗰件事，立法會財委會依兩日就會就政府提出嘅3.0防疫抗疫措施嘅撥款進行審議，如果順利，因疫症而被困喺內地嘅三萬幾個老人家，就可以喺深圳嘅港大醫院覆診同埋配藥嘞，希望班議員以香港市民福?著想，快快脆脆搞掂佢啦！至於記者定義嗰單嘢，又係另一件將好事變壞事嘅政治炒作。盲嘅都睇到啦，喺舊年嗰連串黑暴之中，一大班唔知乜嘢人著住件黃背心攞住部攝錄機，阻住差人做嘢，有啲仲好似超人變身咁，搗亂嗰時就係暴徒，警察嚟到就黃背心上身，扮哂記者。依種咁嘅亂象，正常人都睇到眼火爆啦！仲有呀，嗰啲十一、二歲嘅小學生，俾人聳恿幾句，又話自己係記者去湊熱鬧，幾咁危險呀，有啲人性都唔會鼓勵啲細路仔咁做啦！

記者本來就應該中立，嗰啲擺明早有立場嘅工會組織，喂，浄係代表個別媒體㗎咋，走出嚟嘈喧把閉，都只係代表佢哋嗰個立場嗰啲人一小撮意見，根本冇資格代表整個行業喎。喂，起碼你哋代表唔到我啦！至於某些本來有啲公信力嘅工會，近年已經變咗質，變成某傳媒嘅附庸組織，再冇代表性喇！真係心噏！

唔知係咪佢哋唔識？又或者唔記得呢？記者之所以被譽為「無冕皇帝」，係因為記者係專業人員，有專業嘅知識；受過專業訓練；有專業守則同埋道德，所以受到尊重。咪以為你哋戙起支新聞自由嘅旗，就可以魚目混珠，真正嘅記者一定唔會容忍嗰啲假記者胡作非為，整臭哂記者個「朶」嘅！警方今次修訂記者定義係撥亂反正，趕走啲害羣之馬，令到真正嘅記者以後方便工作。況且，警方又冇限制記者證嘅數量，除非身有屎，又或者動機不良啦，如果唔係，任何媒體只要行得正企得正，正正經經喺新聞處登記咗就得啦，又有乜好嘈呢！

資深媒體人

瑋公子