政是政非 ﹕系唔系都嘈餐饱 嘥气

香港人真系好得意，系唔系都嘈餐饱！好似我先前提到，而家喺内地住嘅香港老人家，因为疫症返唔到嚟香港复诊，所以特首就揾咗港大深圳医院帮忙老人家覆诊配药，等佢哋唔使冇药食，心慌慌唔知点算好！点知𠮶啲坐喺立法会嘅代表医疗界嘅议员，不单止唔支持，仲谂埋啲九唔搭八嘅理由，话担心病人啲病历会泄漏，保障唔到个人私隐㖞！你话系唔系吹胀吖，呢，依几日又有一班自己话系传媒界嘅代表出嚟嘈嘈闭，话好唔妥警方修改左条“警察通例”有关记者嘅定义，话怕影响新闻自由采访自由㖞！查实如果你系记者咁又使乜怕呢？佢哋究竟系唔系为嘈而嘈呢？

嗱，先讲香港老人家喺内地睇病𠮶件事，立法会财委会依两日就会就政府提出嘅3.0防疫抗疫措施嘅拨款进行审议，如果顺利，因疫症而被困喺内地嘅三万几个老人家，就可以喺深圳嘅港大医院覆诊同埋配药嘞，希望班议员以香港市民福?着想，快快脆脆搞掂佢啦！至于记者定义𠮶单嘢，又系另一件将好事变坏事嘅政治炒作。盲嘅都睇到啦，喺旧年𠮶连串黑暴之中，一大班唔知乜嘢人著住件黄背心攞住部摄录机，阻住差人做嘢，有啲仲好似超人变身咁，捣乱𠮶时就系暴徒，警察嚟到就黄背心上身，扮哂记者。依种咁嘅乱象，正常人都睇到眼火爆啦！仲有呀，𠮶啲十一、二岁嘅小学生，俾人耸恿几句，又话自己系记者去凑热闹，几咁危险呀，有啲人性都唔会鼓励啲细路仔咁做啦！

记者本来就应该中立，𠮶啲摆明早有立场嘅工会组织，喂，浄系代表个别媒体㗎咋，走出嚟嘈喧把闭，都只系代表佢哋𠮶个立场𠮶啲人一小撮意见，根本冇资格代表整个行业㖞。喂，起码你哋代表唔到我啦！至于某些本来有啲公信力嘅工会，近年已经变咗质，变成某传媒嘅附庸组织，再冇代表性喇！真系心噏！

唔知系咪佢哋唔识？又或者唔记得呢？记者之所以被誉为“无冕皇帝”，系因为记者系专业人员，有专业嘅知识；受过专业训练；有专业守则同埋道德，所以受到尊重。咪以为你哋戙起支新闻自由嘅旗，就可以鱼目混珠，真正嘅记者一定唔会容忍𠮶啲假记者胡作非为，整臭哂记者个“朶”嘅！警方今次修订记者定义系拨乱反正，赶走啲害羣之马，令到真正嘅记者以后方便工作。况且，警方又冇限制记者证嘅数量，除非身有屎，又或者动机不良啦，如果唔系，任何媒体只要行得正企得正，正正经经喺新闻处登记咗就得啦，又有乜好嘈呢！

资深媒体人

玮公子