政是政非 ﹕做官最高境界 關人隱士

中秋已過，但係香港天氣仍然好熱，仲不時狂風暴雨。剛剛放完長周末，周一清晨正係人人趕住返工返學嘅時候，偏偏嚟個「紅雨」信號，惡劣天氣搞到全市大塞車。好唔容易跳上架的士，司機大佬好鬼勞氣咁話：「大佬，唔係唔想車你呀，不過條街啲車打晒困籠，你坐地鐵好過啦！嗱，我車你去地鐵站嘞！」冇計，只好答應。

的士佬好勞嘈，一路開車，一路鬧：「香港地，冇架喇，個政府廢咗武功，啲官一個不如一個，你話吖，而家除咗個警察一哥似樣啲，邊個官識做嘢吖！你知唔知點解日日塞車呀？香港咁細地方，有成百萬架車呀！路就得咁多嘞，唔塞就奇啦！」的士大佬咁樣踩啲高官，似乎過火咗啲，不過講嘅嘢，又唔係冇道理喎，道路規劃同埋汽車發牌都係政府嘅責任，連的士佬都知嘅道理，高官冇理由唔知喎，除非佢哋係明知係咁，但扮唔知，又或者根本唔想理啦！

搞成咁，負責嘅官員真係難辭其咎㗎，塞車就不在話下啦，車位不足更加離哂譜！政府年年批新車牌，但市內嘅停車場停車位愈來愈少，公眾停車場更加係拆一間少一間！好似金鐘一帶，停車位本來已經嚴重不足，唯一嘅公衆停車場都拆咗，政府就將佢出售謀取豐利。咁，區內唔夠車位喎？質詢官員咩，佢哋就搬出顧問公司嘅大堆文件數據嚟自圓其說。嗰啲專家意見，離地又離譜，同個實際情況相差十萬九千丈遠！平時有司機接送嘅高官，邊度知道民間疾苦吖！嗱，油麻地公眾停車場又話拆喇，嗰度平時閒日都泊滿8成車位㗎，拆咗之後啲車泊去邊呢？問啲高官，佢哋仲好似好有理由咁答話，「附近仍有其他停車場可以滿足需求」喎！不過，佢冇話你聽，依啲私營停車場起碼貴兩成，而且最近嘅都要行一公里咁遠呢！你哋話嘞，揸得車嘅人梗係貪方便啦，會唔會泊架車冇雷公咁遠行餐懵呀？於是，啲車唔係違例泊街邊囉，泊一行唔夠，泊兩行囉，兩行都唔夠，就泊三行，甚至四行啦，總之條路嘅車過得到就得囉！

係呀，大家不妨去金鐘灣仔、油尖旺、觀塘、荃灣，甚至乎九龍城、土瓜灣睇吓，啲內街小巷違例泊車早已失控，到咗周末更加係災難！依種亂象，坐喺政府總部嘅高官係咪真係唔知呢？抑或知但係冇計呢？喂，高官喎，精英喎，唔係好叻，好打得㗎咩，攞幾十萬人工，冇計？

有嘅，交俾乜都關佢哋事嘅警察，要求一哥嚴厲執法，猛發告票掃清違例泊車唔係得囉，香港有3萬幾警察，個個忠誠勇毅，總之政府有乜唔掂，揾警察去搞掂佢就得㗎喇！反正，啲車主塞車塞到炆憎，收告票收到火滾，即時反應都係鬧差人之嘛！班高官一樣可以坐喺冷氣房印印腳，關人隱士囉！真係唔到你唔服㗎，依條絕世好橋，就係要香港咁優秀嘅精英高官先至度得出嚟㗎！

資深媒體人

瑋公子