政是政非 ﹕做官最高境界 关人隐士

中秋已过，但系香港天气仍然好热，仲不时狂风暴雨。刚刚放完长周末，周一清晨正系人人赶住返工返学嘅时候，偏偏嚟个“红雨”信号，恶劣天气搞到全市大塞车。好唔容易跳上架的士，司机大佬好鬼劳气咁话：“大佬，唔系唔想车你呀，不过条街啲车打晒困笼，你坐地铁好过啦！嗱，我车你去地铁站嘞！”冇计，只好答应。

的士佬好劳嘈，一路开车，一路闹：“香港地，冇架喇，个政府废咗武功，啲官一个不如一个，你话吖，而家除咗个警察一哥似样啲，边个官识做嘢吖！你知唔知点解日日塞车呀？香港咁细地方，有成百万架车呀！路就得咁多嘞，唔塞就奇啦！”的士大佬咁样踩啲高官，似乎过火咗啲，不过讲嘅嘢，又唔系冇道理㖞，道路规划同埋汽车发牌都系政府嘅责任，连的士佬都知嘅道理，高官冇理由唔知㖞，除非佢哋系明知系咁，但扮唔知，又或者根本唔想理啦！

搞成咁，负责嘅官员真系难辞其咎㗎，塞车就不在话下啦，车位不足更加离哂谱！政府年年批新车牌，但市内嘅停车场停车位愈来愈少，公众停车场更加系拆一间少一间！好似金钟一带，停车位本来已经严重不足，唯一嘅公众停车场都拆咗，政府就将佢出售谋取丰利。咁，区内唔够车位㖞？质询官员咩，佢哋就搬出顾问公司嘅大堆文件数据嚟自圆其说。𠮶啲专家意见，离地又离谱，同个实际情况相差十万九千丈远！平时有司机接送嘅高官，边度知道民间疾苦吖！嗱，油麻地公众停车场又话拆喇，𠮶度平时闲日都泊满8成车位㗎，拆咗之后啲车泊去边呢？问啲高官，佢哋仲好似好有理由咁答话，“附近仍有其他停车场可以满足需求”㖞！不过，佢冇话你听，依啲私营停车场起码贵两成，而且最近嘅都要行一公里咁远呢！你哋话嘞，揸得车嘅人梗系贪方便啦，会唔会泊架车冇雷公咁远行餐懵呀？于是，啲车唔系违例泊街边囉，泊一行唔够，泊两行囉，两行都唔够，就泊三行，甚至四行啦，总之条路嘅车过得到就得囉！

系呀，大家不妨去金钟湾仔、油尖旺、观塘、荃湾，甚至乎九龙城、土瓜湾睇吓，啲内街小巷违例泊车早已失控，到咗周末更加系灾难！依种乱象，坐喺政府总部嘅高官系咪真系唔知呢？抑或知但系冇计呢？喂，高官㖞，精英㖞，唔系好叻，好打得㗎咩，攞几十万人工，冇计？

有嘅，交俾乜都关佢哋事嘅警察，要求一哥严厉执法，猛发告票扫清违例泊车唔系得囉，香港有3万几警察，个个忠诚勇毅，总之政府有乜唔掂，揾警察去搞掂佢就得㗎喇！反正，啲车主塞车塞到炆憎，收告票收到火滚，即时反应都系闹差人之嘛！班高官一样可以坐喺冷气房印印脚，关人隐士囉！真系唔到你唔服㗎，依条绝世好桥，就系要香港咁优秀嘅精英高官先至度得出嚟㗎！

资深媒体人

玮公子