政是政非 ﹕有机制何须嗌餐死打官司

今时今日做官真唔容易，尤其喺香港依个弱势政府做官，简直系如履薄冰！咪以为有满腔热诚做好份工就冇事，唔搞掂个制度，最终就会无辜辜咁孭镬！嗱，最近失德教师𠮶单嘢，就系最好例子啦！罪魁祸首系𠮶啲失德教师，而监管不力嘅学校亦应该受到谴责。但系教育局都钉咗教师个牌啦，就因为未公布“钉牌”教师个名而成为众矢之的，真系阴功！

香港现行嘅教育制度，虽然经过多次改革，蓝本始终都系由英国佬留落嚟。不过英国佬喺殖民地做嘢向来都好阴湿，订立制度故意做啲又偏徧做漏啲。嗱，喺处理失德教师嘅投诉上，香港就从来冇一套完善机制，所以种下咗今日嘅祸根！不过，喺英国本土，其实早早就有一套行之有效嘅制度，而且程序仲好公开添！系呀，英国设有法定机构Teaching Regulation Agency（TRA）负责认证教师资格，以及管理教师的注册事宜。TRA同时负责处理关于教师嘅投诉，先初部评估，如果认为案件属实，就会排期展开专业操守聆讯。聆讯资料同埋通告都会公开，并且放到网上俾公众阅览，所有人都可以轻易查到，透明度相当高。

TRA甚至有权发出临时禁制令，阻止受查教师继续担任教学工作，直至聆讯完结为止。而TRA对“钉牌”决定嘅指引中就提到，衡量教师失德行为嘅严重性时，其中一个重要的考量系行为对学生嘅思想同行为所造成嘅影响。指引又详细列出不同违反操守嘅情况，例如教师散播政治或宗教极端主义，或者故意让学生接触有关行动就会被判定为不适合再当教师，随时可被取消教师资格。

作育英才系教师嘅天职，学生哥白纸一张，如果喺教育过程被误导，被污染，将一生受害！嗱，有人仲会问，失德教师名单系咪一定要公开呢？依个问题，大家嗌亦冇谓，英国佬订依个制度出来自然有其必要性啦，至于佢哋当年点解唔喺香港订一套咁嘅制度，就真系天晓得嘞！其实，唔止英国呀，话埋俾你哋听啦，美国佛罗里达州同澳洲昆士兰都有类似制度㗎！

话说回头嘞，香港如果都有一套咁嘅机制，就唔驶前特首梁生咁劳嘈，日日咬住教育局官员唔放，要佢公开失德教师名单啦！一切按照机制做，就天下太平啦！计我话，而家冇计㗎嘞，最终都系要交俾法庭去处理，法官话公开名单就公开囉！正所谓讲多无谓，如今重中之重，就系快啲订个机制嚟“招呼”𠮶班失德教师。唔好拖喇，唔识做唔紧要㗎，照抄啦，将英国佬𠮶套整旧搬过嚟唔系就掂囉！

资深媒体人

玮公子