政是政非 ﹕咪再玩嘢喇，做实事啦！

人必自侮而后人侮之，自编自导自演民调，仅得300几个人支持佢哋留任1年嘅议员，喺立法会嘅马骝戏终于上周五首演咗喇，20几条友仔为咗凸顕佢哋嘅与别不同，几廿岁人仲好似小学鸡咁，喺个议会度玩点指兵兵游戏，个个嬉皮笑脸嘅赖皮样，真系丢架，睇见都想作呕！唔知佢哋乜嘢思维？咁样做，就系议会抗争咩？会赢到选票咩？抑或好天真咁认为，早已经同佢哋割?嘅勇武后生仔，会返嚟支持佢哋呢？简直白痴！

立法会喺上周五举行内会同埋财委会选举正副主席，𠮶20几个唔嫁又嫁嘅议员，若无其事厚颜无耻，乖乖咁坐哂响度，断估佢哋都冇咁好死㗎嘞，一定会标奇立异玩吓嘢，做番场戏，算系对一啲支持者（不过唔知仲有几多？）交代吓嘅！但真系估唔到佢哋度条戏轨咁差，竟然要玩小学鸡嘅“点指兵兵”！20几条友，你提名我，我又提名你，提到冇得提就连建制议员都玩埋，提名对方做主席或副主席。目的就系拖时间，玩吓嘢咁话囉！

过去4年依班友仔玩嘢多过做嘢，除咗白逗高薪，攞住个议员衔头作威作福之外，对个议会同埋对个社会有乜贡献，大家有眼睇啦！佢哋自己亦都心知肚明㗎！想做正副主席？肯定阻住个地球转啦！边会当选呢？互相提名选主席，被人提名𠮶个仲要扮“慎重考虑”，“勉为其难”嘅样，之但系啲戏又屎，𠮶样鬼咁乞人憎！真系唔知咁样玩法有咩用呢？系，本来半个钟搞掂嘅事，系拖咗几个钟囉，但就系系咁多囉！“你有张良计、我有过墙梯”卒之建制派议员见招拆招，顺利选出咗两个委员会正副主席。

有时，都唔知应该点样形容𠮶班泛民议员！话佢哋蠢咩，又蠢唔哂，求其喺个议会度玩吓嘢又逗百几万人工，而家咁嘅时势，真系好过做乜！但系又见得佢哋好精㖞，事关今时今日香港咁嘅环境，香港人都期望快啲振兴经济，搞好民生恢复繁荣，但佢哋徧徧喺个立法会度阻住地球转，真系神憎鬼厌，仲边有运行吖！可能，佢哋或者仍然幻想咁样做可以证明自己仍然系抗争派，仲可以搏到啲徧激后生仔掌声啦！如果咁谂，就更加系戆居夹耳聋嘞！嗱，系人都知，当𠮶日佢哋为咗𠮶笔唔舍得嘅俸禄而选择留低之后，班后生仔已经决定同佢哋各行各路喇！咪再痴心妄想啦！

计我话，依班泛民返唔到转头㗎喇，而家应该洗心革面，切切实实做好份工，专心做实事，令香港尽快重回正轨。咁样，可能仲会搏到一啲好感！如果唔系，佢哋蹉跎埋依一年，肯定玩完，仲会遗臭万年，万劫不复！正所谓浪子回头金不换，希望佢哋回头是岸啦！

资深媒体人

玮公子