政是政非 ﹕ 警队“一哥”完美示范为官之道

警队“一哥”邓Sir依一轮真系马不停蹄，啱啱先粉墨登场著返套“一柴”警察制服拍宣传片，先几日8号风球，佢又出台风更，除咗为同袍打气之外，又亲身体验一下基层警员嘅辛苦，真系关怀下属嘅好上司。嗱，依啲咪系做高官嘅典范囉，起码佢唔系好似其他有啲官员咁样净系得个讲字，而系身体力行去做㗎！

香港地唔少高官，日日坐喺冷气房，自以为高高在上，出入都系高级场所消费，边度知道坐喺茶餐厅基层小市民嘅民间疾苦吖！市民谂啲乜？需要啲乜？佢哋都唔知，所以谂出嚟嘅政策就离哂地！如果个个都好似邓Sir咁贴地，香港人就唔驶而家咁辛苦啦！

讲开又讲，邓Sir除咗体恤下属之外，亦都系近年难得一见不卑不亢，而且好有“吉士”嘅官员。近日，九龙城区议会14个区议员，喺未徴询其他议员同意之下，夹埋个区议会主席就决议唔俾警队“一哥”出席区议会会议。依个完全系一个玩政治嘅决定，目的系要“一哥”难堪！不过，邓Sir就不愠不火示范咗一场完美嘅政治公关骚，毫不退缩，仲主动约见记者，话俾全港市民知道，而家唔系警队唔肯同九龙城区议会合作呀，而系有14条友仔把持住个区议会，唔俾佢出席㗎咋！“一哥”仲摆到明咁话：“我得一个人，你哋有14个人都怕咗我？”嗱，依种唔系为官之道囉，正所谓“为官避事平生耻”，今时今日香港依个政治环境，官员面对依种无理横蛮嘅刁难，千祈唔可以逃避。公道自在人心，好似邓Sir毫不畏?咁面对挑衅，最终对方唔系自暴其短囉！

九龙城区议会单嘢，亦都俾大家睇清楚所谓嘅民主其实系揾笨实，依班新贵以前就批评区议会冇民主，又话人哋人多虾人少，结果佢哋攞住争取民主嘅光环入咗区议会，而家得到权力之后，就用更加独裁嘅手段为所欲为！话说，日前九龙城区议会开会，有议员就质询“一哥”依单嘢，点知个主席居然话未准许个议员发言，赶咗佢出会场。哗，咁都得？大家都系民选议员，你唔啱听就赶人走，咪一言堂囉，你哋玩哂啦！所以话，民主，只不过系用嚟夺权嘅口号嚟架咋，你哋睇吓台湾吖，民进党上台之后几咁独裁吖，整治国民党几咁毒辣呀，而家连媒体“中天”，因为唔听话都要被整！民主依家嘢，讲就天下无敌，佢哋做起上嚟，就无能为力㗎喇！香港人，咪咁天真啦！

资深媒体人

玮公子