政是政非﹕ 尽快同内地通关最实际

一场疫症，因为病毒检测同隔离政策，搞到好钟意旅行嘅香港人，被迫困咗几个月冇得出境，真系人都癫。近日疫情反复，香港嘅本地感染个案始终无办法保持一段时间归零，感染风险仍在，想要回复以前咁自由通关出行，睇怕到年底之前都唔乐观！政府先前煞有介事咁宣布同新加坡达成初步协议，搞个乜鬼“旅游气泡”，话只要旅客做足测试，证明冇感染嘞，就可获特许旅游㖞，但系work唔work呢？咁就唔知嘞！

依个计划，听起嚟好劲，但谂清楚，计吓条数，当堂窒步。依个“气泡”嘅先决条件，系喺旅游之前取得病毒测试证明，先可以出境香港，当入境新加坡时又要做一次。好嘞，当离开当地再返嚟香港，再要做一次。按照香港认可化验所收费，每次检测要收至少1000蚊，咁，即净系验测费断估都成3000蚊。加埋旅费约4000蚊，条数都唔细㗎！虽然话香港人屈咗咁耐，好想出去透吓气啫，但去一趟新加坡两个人就成皮几嘢，老老实实吖，真系好大考虑㗎！

旅游业就呼吁政府出面，同啲化验所倾吓，将个检测收费降到每次二、三百蚊。不过，边有咁容易吖！除非又系政府补贴囉，啲化验所都要维皮㗎，点肯蚀俾你呀？嗱，就算香港肯减价，新加坡𠮶边亦未必肯同意啦！当然，政府咁积极搞“旅游气泡”，系好事，但倒返转头谂，既然花咁多精力咯，不如搞掂同内地通关先啦！喂，内地咁多旅游点，香港人返去旅游不在话下啦，仲有好多人嘅正常生活，系等住通关先可以恢复㗎！凡事都有缓急轻重，搞掂咗个内地通关，“旅游气泡”自然就系锦上添花啦！计我话，政府最实际系大刀阔斧，彻彻底底咁嚟一次强制性全民大检测，好似青岛咁，快快脆脆3日搞掂，揾出𠮶啲隐形带病毒者，令到香港本地感染清零维持一段时间，咁咪系好似澳门咁，同内地通咗关咯，以后一切都好办啦！

政府做嘢，有时真系令人不解！好似最近咁，无啦啦开咗几个检测中心，搞咗几日，点知无端端又话关闭！咁做乜啫，既然开咗，又有市民排队检测，即系有需要啦，点解唔可以继续做落去呢？就算唔开哂咁多个，留番一个长期运作都好吖！又好似，要求𠮶啲“特定群组”检测，居然唔系强制性，派个樽俾佢哋自己返屋企搞，交唔交番去又唔知，咁测试嚟有鬼用咩！唉，依啲事就反映出政府喺抗疫工作上嘅思维混乱，进退失据，搞到而家都系事倍功半！

资深媒体人

玮公子