政是政非﹕交通补贴不如谂计降低交通费

香港交通费高昂，真系世界闻名，无他嘅，因为个政府唔想落本钱去搞交通设施，氹啲企业落水之后，要保障企业嘅合理回报，又要崇尚自由经济，所以交通收费订到鬼咁高，政府都冇say！苦就苦在升斗市民被迫要俾贵交通费都无可奈何！谷谷埋埋啲怨气无从抒发，咁，又变咗系另一个造成深层次矛盾嘅诱因囉！其实，只要个政府肯承担多啲，𠮶局面就会好唔同！

香港人其实好忍得㗎，喺太平盛世，大家仲揾到啖食嘅时候还可以忍气吞声，但系到个经济唔掂，大把人失业嘅时候，个个都㩒住荷包计到尽，悭得一蚊得一蚊，咁就金睛火眼算到足啦！其实依两年香港嘅环境真系麻麻，去年社会运动已经搞到元气大伤，好多人已经失业，特别系年过60岁，接近退休年龄𠮶班人，首先就俾人开刀！喺咁现实嘅香港地，年纪大系原罪，佢哋被炒之后要揾番嘢做，难过登天。政府将支援长者嘅年龄定喺65岁，但系对60至64岁嘅人就毫无支持！旧年疫症未嚟之前，特首体会到依班人嘅苦处，宣布将提供俾长者嘅“2蚊全港乘车优惠”扩展到60岁。其实依个系一个“德政”嚟㗎，点知上有政策、下有对策，啲福利官员唔知系阳奉阴违抑或唔想做，诸多借口话搞下咨询，又搞吓程序，一拖又咗一年有多，到今日都未实行！

最近，传媒收到风，话依个方案俾行政会议成员阻行，仲话可能取消添！喂，有冇离谱啲呀？行政会议会究竟有冇理吓人感受㗎？夹硬将特首个“德政”阉割咗，累到特首孭镬，你哋又于心何忍呢？点讲都唔通啦！有局内人话，其实政府都好头痕，一场疫症令到库房失哂预算，救旅游，又救主题公园，要补就业，又要救零售，驶咗好多钱！最弊个疫症随时再爆，唔知要驶多几多钱？真系无底深潭㗎！“长者2蚊乘车优惠”旧年都用咗14亿，如果扩展到60岁，保守估计要用多6亿几，所以悭得就悭囉！

计我话，对个政府嚟讲，几亿湿湿碎啦！特首一诺千金，诚信至重要吖嘛，岂可反悔呢！政府近年都大拿拿驶咗唔少钱啦，悭咗依几亿，失咗民心，唔值得吖！况且，政府要补贴咁多钱，系因为交通费贵，今时今日香港交通费咁贵，政府其实唔系冇办法㗎，问题系肯唔肯做啫！有高人建议过政府回购港铁，减车费就即时立竿见影嘞，亦系一个唔错选择吖！交通费平番咯，补贴就自然唔驶咁多啦！总之一句，解玲还须系玲人，依个局点拆，就要考下一众高官嘅智慧喇！

资深媒体人

玮公子