政是政非﹕限聚放宽6人点解做一半呢？

有句话：“差之毫厘 缪以千里”，几乎系人都识讲，但系咪真正明其所意焉，又能掌握到说话中嘅精神，好好咁发挥呢？咁就好难讲嘞！现实生活中，有唔少例子，都可以证明，好多人都系识讲唔识做。嗱，好似政府公布咗明日放宽限聚令政策，本来应该皆大欢喜，点知就系啲官员谂嘢唔够仔细，又冇心理准备会被人质，解画解到唔汤唔水结结巴巴，好事又变咗坏事囉！

最新放宽嘅限聚令，将食肆用餐人数，由每枱4人放宽到6人。无论对餐饮业抑或市民嚟讲，都系一件好事。不过，限聚令仍然将街上聚集人数维持为4人，咁就即刻引起争议嘞！好简单，6个人约埋去食饭，饮饱食醉之后意犹未尽，散咗席仍然企喺餐厅门口吹水唔想走，嗱，咁就已经犯法㗎喇，执法人员随时可以6个都告哂，每人罚款两千大元㗎！咁，挑通眼眉嘅媒体朋友梗系睇到问题所在啦，最直接嘅就系问个管事官员啦，但点知官员嘅答案，真系听到人好炆憎！佢话㖞：“我相信执法人员系会好理性咁去处理依个情况嘅！”吓，唔系吓嘛，法律嚟㗎，执法者系根据法例规定条界线执法，你过咗界就拉你告你囉，乜嘢理性唔冇理性呀！如果法例定义唔清晰，而靠执法者因应环境同埋所谓嘅理性执法，好危险㗎噃！大佬呀，如果有人唔理性，又或者好硬颈咁，唔理三七廿一“依法办事”，有乜唔妥就等法官去判啦！咁，就会有好多“寃案”；好多争议，个法庭就好唔得闲啦！

依件事又再反映时下嘅官员，真系谂嘢唔够全面，又唔够细致，就系差咗𠮶少少囉！如果醒啲，早就应该谂到依个漏洞啦！一视同仁，将街上聚众人数都放宽为6个人，咁就冇得嘈啦！好，又当官员可能有“苦衷”，迫不得已要咁做住先。咁就唔该准备好一个自圆其说嘅理由，应付啲穷追猛打嘅媒体啦！喂，你谂唔到，就请教吓啲高人啦，起码唔会好似而家咁，俾一个明会唔收货，而且仲会继续俾人插嘅答案啦！系囉，做嘢同谂嘢就差咁少少㗎咋，出嚟嘅效果就缪以千里啦！计我话，有心唔怕迟，既然而家大家都发现咗问题咯，官员就面对现实立即修正啦，快快放宽埋街上聚众限制为6人，咁就冇得抝嘞！

资深媒体人

玮公子